1 Samuel 3

¹ וְהַנַּ֧עַר שְׁמוּאֵ֛ל מְשָׁרֵ֥ת אֶת־יְהוָ֖ה לִפְנֵ֣י עֵלִ֑י וּדְבַר־יְהוָ֗ה הָיָ֤ה יָקָר֙ בַּיָּמִ֣ים הָהֵ֔ם אֵ֥ין חָזֹ֖ון נִפְרָֽץ׃ ס wehanaʿar shemuʾel mesharet ʾet־yehwah lifeney ʿeliy udevar־yehwah hayah yaqar bayamiym hahem ʾeyn ḥazown niferats׃ s

² וַֽיְהִי֙ בַּיֹּ֣ום הַה֔וּא וְעֵלִ֖י שֹׁכֵ֣ב בִּמְקֹמֹ֑ו [וְעֵינֹו כ] (וְעֵינָיו֙ ק) הֵחֵ֣לּוּ כֵהֹ֔ות לֹ֥א יוּכַ֖ל לִרְאֹֽות׃ wayehiy bayowm hahuʾ weʿeliy shokhev bimeqomow [weʿeynow kh] (weʿeynayw q) heḥelu khehowt loʾ yukhal lireʾowt׃

³ וְנֵ֤ר אֱלֹהִים֙ טֶ֣רֶם יִכְבֶּ֔ה וּשְׁמוּאֵ֖ל שֹׁכֵ֑ב בְּהֵיכַ֣ל יְהוָ֔ה אֲשֶׁר־שָׁ֖ם אֲרֹ֥ון אֱלֹהִֽים׃ פ wener ʾelohiym ṭerem yikhebeh ushemuʾel shokhev beheykhal yehwah ʾasher־sham ʾarown ʾelohiym׃ f

⁴ וַיִּקְרָ֧א יְהוָ֛ה אֶל־שְׁמוּאֵ֖ל וַיֹּ֥אמֶר הִנֵּֽנִי׃ wayiqeraʾ yehwah ʾel־shemuʾel wayoʾmer hineniy׃

⁵ וַיָּ֣רָץ אֶל־עֵלִ֗י וַיֹּ֤אמֶר הִנְנִי֙ כִּֽי־קָרָ֣אתָ לִּ֔י וַיֹּ֥אמֶר לֹֽא־קָרָ֖אתִי שׁ֣וּב שְׁכָ֑ב וַיֵּ֖לֶךְ וַיִּשְׁכָּֽב׃ ס wayarats ʾel־ʿeliy wayoʾmer hineniy kiy־qaraʾta liy wayoʾmer loʾ־qaraʾtiy shuv shekhav wayelekhe wayishekav׃ s

⁶ וַיֹּ֣סֶף יְהוָ֗ה קְרֹ֣א עֹוד֮ שְׁמוּאֵל֒ וַיָּ֤קָם שְׁמוּאֵל֙ וַיֵּ֣לֶךְ אֶל־עֵלִ֔י וַיֹּ֣אמֶר הִנְנִ֔י כִּ֥י קָרָ֖אתָ לִ֑י וַיֹּ֛אמֶר לֹֽא־קָרָ֥אתִי בְנִ֖י שׁ֥וּב שְׁכָֽב׃ wayosef yehwah qeroʾ ʿowd shemuʾel wayaqam shemuʾel wayelekhe ʾel־ʿeliy wayoʾmer hineniy kiy qaraʾta liy wayoʾmer loʾ־qaraʾtiy veniy shuv shekhav׃

⁷ וּשְׁמוּאֵ֕ל טֶ֖רֶם יָדַ֣ע אֶת־יְהוָ֑ה וְטֶ֛רֶם יִגָּלֶ֥ה אֵלָ֖יו דְּבַר־יְהוָֽה׃ ushemuʾel ṭerem yadaʿ ʾet־yehwah weṭerem yigaleh ʾelayw devar־yehwah׃

⁸ וַיֹּ֨סֶף יְהוָ֥ה קְרֹא־שְׁמוּאֵל֮ בַּשְּׁלִשִׁית֒ וַיָּ֙קָם֙ וַיֵּ֣לֶךְ אֶל־עֵלִ֔י וַיֹּ֣אמֶר הִנְנִ֔י כִּ֥י קָרָ֖אתָ לִ֑י וַיָּ֣בֶן עֵלִ֔י כִּ֥י יְהוָ֖ה קֹרֵ֥א לַנָּֽעַר׃ wayosef yehwah qeroʾ־shemuʾel bashelishiyt wayaqam wayelekhe ʾel־ʿeliy wayoʾmer hineniy kiy qaraʾta liy wayaven ʿeliy kiy yehwah qoreʾ lanaʿar׃

⁹ וַיֹּ֨אמֶר עֵלִ֣י לִשְׁמוּאֵל֮ לֵ֣ךְ שְׁכָב֒ וְהָיָה֙ אִם־יִקְרָ֣א אֵלֶ֔יךָ וְאָֽמַרְתָּ֙ דַּבֵּ֣ר יְהוָ֔ה כִּ֥י שֹׁמֵ֖עַ עַבְדֶּ֑ךָ וַיֵּ֣לֶךְ שְׁמוּאֵ֔ל וַיִּשְׁכַּ֖ב בִּמְקֹומֹֽו׃ wayoʾmer ʿeliy lishemuʾel lekhe shekhav wehayah ʾim־yiqeraʾ ʾeleykha weʾamareta daber yehwah kiy shomeaʿ ʿavedekha wayelekhe shemuʾel wayishekav bimeqowmow׃

¹⁰ וַיָּבֹ֤א יְהוָה֙ וַיִּתְיַצַּ֔ב וַיִּקְרָ֥א כְפַֽעַם־בְּפַ֖עַם שְׁמוּאֵ֣ל ׀ שְׁמוּאֵ֑ל וַיֹּ֤אמֶר שְׁמוּאֵל֙ דַּבֵּ֔ר כִּ֥י שֹׁמֵ֖עַ עַבְדֶּֽךָ׃ פ wayavoʾ yehwah wayiteyatsav wayiqeraʾ khefaʿam־befaʿam shemuʾel ׀ shemuʾel wayoʾmer shemuʾel daber kiy shomeaʿ ʿavedekha׃ f

¹¹ וַיֹּ֤אמֶר יְהוָה֙ אֶל־שְׁמוּאֵ֔ל הִנֵּ֧ה אָנֹכִ֛י עֹשֶׂ֥ה דָבָ֖ר בְּיִשְׂרָאֵ֑ל אֲשֶׁר֙ כָּל־שֹׁ֣מְעֹ֔ו תְּצִלֶּ֖ינָה שְׁתֵּ֥י אָזְנָֽיו׃ wayoʾmer yehwah ʾel־shemuʾel hineh ʾanokhiy ʿoseh davar beyiseraʾel ʾasher kal־shomeʿow tetsileynah shetey ʾazenayw׃

¹² בַּיֹּ֤ום הַהוּא֙ אָקִ֣ים אֶל־עֵלִ֔י אֵ֛ת כָּל־אֲשֶׁ֥ר דִּבַּ֖רְתִּי אֶל־בֵּיתֹ֑ו הָחֵ֖ל וְכַלֵּֽה׃ bayowm hahuʾ ʾaqiym ʾel־ʿeliy ʾet kal־ʾasher dibaretiy ʾel־beytow haḥel wekhaleh׃

¹³ וְהִגַּ֣דְתִּי לֹ֔ו כִּֽי־שֹׁפֵ֥ט אֲנִ֛י אֶת־בֵּיתֹ֖ו עַד־עֹולָ֑ם בַּעֲוֹ֣ן אֲשֶׁר־יָדַ֗ע כִּֽי־מְקַֽלְלִ֤ים לָהֶם֙ בָּנָ֔יו וְלֹ֥א כִהָ֖ה בָּֽם׃ wehigadetiy low kiy־shofeṭ ʾaniy ʾet־beytow ʿad־ʿowlam baʿaon ʾasher־yadaʿ kiy־meqaleliym lahem banayw weloʾ khihah bam׃

¹⁴ וְלָכֵ֥ן נִשְׁבַּ֖עְתִּי לְבֵ֣ית עֵלִ֑י אִֽם־יִתְכַּפֵּ֞ר עֲוֹ֧ן בֵּית־עֵלִ֛י בְּזֶ֥בַח וּבְמִנְחָ֖ה עַד־עֹולָֽם׃ welakhen nishebaʿetiy leveyt ʿeliy ʾim־yitekaper ʿaon beyt־ʿeliy bezevaḥ uvemineḥah ʿad־ʿowlam׃

¹⁵ וַיִּשְׁכַּ֤ב שְׁמוּאֵל֙ עַד־הַבֹּ֔קֶר וַיִּפְתַּ֖ח אֶת־דַּלְתֹ֣ות בֵּית־יְהוָ֑ה וּשְׁמוּאֵ֣ל יָרֵ֔א מֵהַגִּ֥יד אֶת־הַמַּרְאָ֖ה אֶל־עֵלִֽי׃ wayishekav shemuʾel ʿad־haboqer wayifetaḥ ʾet־daletowt beyt־yehwah ushemuʾel yareʾ mehagiyd ʾet־hamareʾah ʾel־ʿeliy׃

¹⁶ וַיִּקְרָ֤א עֵלִי֙ אֶת־שְׁמוּאֵ֔ל וַיֹּ֖אמֶר שְׁמוּאֵ֣ל בְּנִ֑י וַיֹּ֖אמֶר הִנֵּֽנִי׃ wayiqeraʾ ʿeliy ʾet־shemuʾel wayoʾmer shemuʾel beniy wayoʾmer hineniy׃

¹⁷ וַיֹּ֗אמֶר מָ֤ה הַדָּבָר֙ אֲשֶׁ֣ר דִּבֶּ֣ר אֵלֶ֔יךָ אַל־נָ֥א תְכַחֵ֖ד מִמֶּ֑נִּי כֹּ֣ה יַעֲשֶׂה־לְּךָ֤ אֱלֹהִים֙ וְכֹ֣ה יֹוסִ֔יף אִם־תְּכַחֵ֤ד מִמֶּ֙נִּי֙ דָּבָ֔ר מִכָּל־הַדָּבָ֖ר אֲשֶׁר־דִּבֶּ֥ר אֵלֶֽיךָ׃ wayoʾmer mah hadavar ʾasher diber ʾeleykha ʾal־naʾ tekhaḥed mimeniy koh yaʿaseh־lekha ʾelohiym wekhoh yowsiyf ʾim־tekhaḥed mimeniy davar mikal־hadavar ʾasher־diber ʾeleykha׃

¹⁸ וַיַּגֶּד־לֹ֤ו שְׁמוּאֵל֙ אֶת־כָּל־הַדְּבָרִ֔ים וְלֹ֥א כִחֵ֖ד מִמֶּ֑נּוּ וַיֹּאמַ֕ר יְהוָ֣ה ה֔וּא הַטֹּ֥וב בְּעֵינָ֖ו יַעֲשֶֽׂה׃ פ wayaged־low shemuʾel ʾet־kal־hadevariym weloʾ khiḥed mimenu wayoʾmar yehwah huʾ haṭowv beʿeynaw yaʿaseh׃ f

¹⁹ וַיִּגְדַּ֖ל שְׁמוּאֵ֑ל וַֽיהוָה֙ הָיָ֣ה עִמֹּ֔ו וְלֹֽא־הִפִּ֥יל מִכָּל־דְּבָרָ֖יו אָֽרְצָה׃ wayigedal shemuʾel wayhwah hayah ʿimow weloʾ־hipiyl mikal־devarayw ʾaretsah׃

²⁰ וַיֵּ֙דַע֙ כָּל־יִשְׂרָאֵ֔ל מִדָּ֖ן וְעַד־בְּאֵ֣ר שָׁ֑בַע כִּ֚י נֶאֱמָ֣ן שְׁמוּאֵ֔ל לְנָבִ֖יא לַיהוָֽה׃ wayedaʿ kal־yiseraʾel midan weʿad־beʾer shavaʿ kiy neʾeman shemuʾel lenaviyʾ layhwah׃

²¹ וַיֹּ֥סֶף יְהוָ֖ה לְהֵרָאֹ֣ה בְשִׁלֹ֑ה כִּֽי־נִגְלָ֨ה יְהוָ֧ה אֶל־שְׁמוּאֵ֛ל בְּשִׁלֹ֖ו בִּדְבַ֥ר יְהוָֽה׃ פ wayosef yehwah leheraʾoh veshiloh kiy־nigelah yehwah ʾel־shemuʾel beshilow bidevar yehwah׃ f