Amos 1

¹ דִּבְרֵ֣י עָמֹ֔וס אֲשֶׁר־הָיָ֥ה בַנֹּקְדִ֖ים מִתְּקֹ֑ועַ אֲשֶׁר֩ חָזָ֨ה עַל־יִשְׂרָאֵ֜ל בִּימֵ֣י ׀ עֻזִּיָּ֣ה מֶֽלֶךְ־יְהוּדָ֗ה וּבִימֵ֞י יָרָבְעָ֤ם בֶּן־יֹואָשׁ֙ מֶ֣לֶךְ יִשְׂרָאֵ֔ל שְׁנָתַ֖יִם לִפְנֵ֥י הָרָֽעַשׁ׃ diverey ʿamows ʾasher־hayah vanoqediym miteqowʿa ʾasher ḥazah ʿal־yiseraʾel biymey ׀ ʿuziyah melekhe־yehudah uviymey yaraveʿam ben־yowʾash melekhe yiseraʾel shenatayim lifeney haraʿash׃

² וַיֹּאמַ֓ר ׀ יְהוָה֙ מִצִּיֹּ֣ון יִשְׁאָ֔ג וּמִירוּשָׁלִַ֖ם יִתֵּ֣ן קֹולֹ֑ו וְאָֽבְלוּ֙ נְאֹ֣ות הָרֹעִ֔ים וְיָבֵ֖שׁ רֹ֥אשׁ הַכַּרְמֶֽל׃ פ wayoʾmar ׀ yehwah mitsiyown yisheʾag umiyrushalim yiten qowlow weʾavelu neʾowt haroʿiym weyavesh roʾsh hakaremel׃ f

³ כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י דַמֶּ֔שֶׂק וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־דּוּשָׁ֛ם בַּחֲרֻצֹ֥ות הַבַּרְזֶ֖ל אֶת־הַגִּלְעָֽד׃ koh ʾamar yehwah ʿal־sheloshah pisheʿey dameseq weʿal־ʾarebaʿah loʾ ʾashiyvenu ʿal־dusham baḥarutsowt habarezel ʾet־hagileʿad׃

⁴ וְשִׁלַּ֥חְתִּי אֵ֖שׁ בְּבֵ֣ית חֲזָאֵ֑ל וְאָכְלָ֖ה אַרְמְנֹ֥ות בֶּן־הֲדָֽד׃ weshilaḥetiy ʾesh beveyt ḥazaʾel weʾakhelah ʾaremenowt ben־hadad׃

⁵ וְשָֽׁבַרְתִּי֙ בְּרִ֣יחַ דַּמֶּ֔שֶׂק וְהִכְרַתִּ֤י יֹושֵׁב֙ מִבִּקְעַת־אָ֔וֶן וְתֹומֵ֥ךְ שֵׁ֖בֶט מִבֵּ֣ית עֶ֑דֶן וְגָל֧וּ עַם־אֲרָ֛ם קִ֖ירָה אָמַ֥ר יְהוָֽה׃ פ weshavaretiy beriyḥa dameseq wehikheratiy yowshev mibiqeʿat־ʾawen wetowmekhe sheveṭ mibeyt ʿeden wegalu ʿam־ʾaram qiyrah ʾamar yehwah׃ f

⁶ כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י עַזָּ֔ה וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־הַגְלֹותָ֛ם גָּל֥וּת שְׁלֵמָ֖ה לְהַסְגִּ֥יר לֶאֱדֹֽום׃ koh ʾamar yehwah ʿal־sheloshah pisheʿey ʿazah weʿal־ʾarebaʿah loʾ ʾashiyvenu ʿal־hagelowtam galut shelemah lehasegiyr leʾedowm׃

⁷ וְשִׁלַּ֥חְתִּי אֵ֖שׁ בְּחֹומַ֣ת עַזָּ֑ה וְאָכְלָ֖ה אַרְמְנֹתֶֽיהָ׃ weshilaḥetiy ʾesh beḥowmat ʿazah weʾakhelah ʾaremenoteyha׃

⁸ וְהִכְרַתִּ֤י יֹושֵׁב֙ מֵֽאַשְׁדֹּ֔וד וְתֹומֵ֥ךְ שֵׁ֖בֶט מֵֽאַשְׁקְלֹ֑ון וַהֲשִׁיבֹ֨ותִי יָדִ֜י עַל־עֶקְרֹ֗ון וְאָֽבְדוּ֙ שְׁאֵרִ֣ית פְּלִשְׁתִּ֔ים אָמַ֖ר אֲדֹנָ֥י יְהוִֽה׃ פ wehikheratiy yowshev meʾashedowd wetowmekhe sheveṭ meʾasheqelown wahashiyvowtiy yadiy ʿal־ʿeqerown weʾavedu sheʾeriyt pelishetiym ʾamar ʾadonay yehwih׃ f

⁹ כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵי־צֹ֔ר וְעַל־אַרְבָּעָ֖ה לֹ֣א אֲשִׁיבֶ֑נּוּ עַֽל־הַסְגִּירָ֞ם גָּל֤וּת שְׁלֵמָה֙ לֶאֱדֹ֔ום וְלֹ֥א זָכְר֖וּ בְּרִ֥ית אַחִֽים׃ koh ʾamar yehwah ʿal־sheloshah pisheʿey־tsor weʿal־ʾarebaʿah loʾ ʾashiyvenu ʿal־hasegiyram galut shelemah leʾedowm weloʾ zakheru beriyt ʾaḥiym׃

¹⁰ וְשִׁלַּ֥חְתִּי אֵ֖שׁ בְּחֹ֣ומַת צֹ֑ר וְאָכְלָ֖ה אַרְמְנֹתֶֽיהָ׃ פ weshilaḥetiy ʾesh beḥowmat tsor weʾakhelah ʾaremenoteyha׃ f

¹¹ כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י אֱדֹ֔ום וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־רָדְפֹ֨ו בַחֶ֤רֶב אָחִיו֙ וְשִׁחֵ֣ת רַחֲמָ֔יו וַיִּטְרֹ֤ף לָעַד֙ אַפֹּ֔ו וְעֶבְרָתֹ֖ו שְׁמָ֥רָה נֶֽצַח׃ koh ʾamar yehwah ʿal־sheloshah pisheʿey ʾedowm weʿal־ʾarebaʿah loʾ ʾashiyvenu ʿal־radefow vaḥerev ʾaḥiyw weshiḥet raḥamayw wayiṭerof laʿad ʾapow weʿeveratow shemarah netsaḥ׃

¹² וְשִׁלַּ֥חְתִּי אֵ֖שׁ בְּתֵימָ֑ן וְאָכְלָ֖ה אַרְמְנֹ֥ות בָּצְרָֽה׃ פ weshilaḥetiy ʾesh beteyman weʾakhelah ʾaremenowt batserah׃ f

¹³ כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י בְנֵֽי־עַמֹּ֔ון וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־בִּקְעָם֙ הָרֹ֣ות הַגִּלְעָ֔ד לְמַ֖עַן הַרְחִ֥יב אֶת־גְּבוּלָֽם׃ koh ʾamar yehwah ʿal־sheloshah pisheʿey veney־ʿamown weʿal־ʾarebaʿah loʾ ʾashiyvenu ʿal־biqeʿam harowt hagileʿad lemaʿan hareḥiyv ʾet־gevulam׃

¹⁴ וְהִצַּ֤תִּי אֵשׁ֙ בְּחֹומַ֣ת רַבָּ֔ה וְאָכְלָ֖ה אַרְמְנֹותֶ֑יהָ בִּתְרוּעָה֙ בְּיֹ֣ום מִלְחָמָ֔ה בְּסַ֖עַר בְּיֹ֥ום סוּפָֽה׃ wehitsatiy ʾesh beḥowmat rabah weʾakhelah ʾaremenowteyha biteruʿah beyowm mileḥamah besaʿar beyowm sufah׃

¹⁵ וְהָלַ֥ךְ מַלְכָּ֖ם בַּגֹּולָ֑ה ה֧וּא וְשָׂרָ֛יו יַחְדָּ֖ו אָמַ֥ר יְהוָֽה׃ פ wehalakhe malekam bagowlah huʾ wesarayw yaḥedaw ʾamar yehwah׃ f