1 Samuel 7

¹ וַיָּבֹ֜אוּ אַנְשֵׁ֣י ׀ קִרְיַ֣ת יְעָרִ֗ים וַֽיַּעֲלוּ֙ אֶת־אֲרֹ֣ון יְהוָ֔ה וַיָּבִ֣אוּ אֹתֹ֔ו אֶל־בֵּ֥ית אֲבִינָדָ֖ב בַּגִּבְעָ֑ה וְאֶת־אֶלְעָזָ֤ר בְּנֹו֙ קִדְּשׁ֔וּ לִשְׁמֹ֖ר אֶת־אֲרֹ֥ון יְהוָֽה׃ פ wayavoʾu ʾaneshey ׀ qireyat yeʿariym wayaʿalu ʾet־ʾarown yehwah wayaviʾu ʾotow ʾel־beyt ʾaviynadav bagiveʿah weʾet־ʾeleʿazar benow qideshu lishemor ʾet־ʾarown yehwah׃ f

² וַיְהִ֗י מִיֹּ֞ום שֶׁ֤בֶת הָֽאָרֹון֙ בְּקִרְיַ֣ת יְעָרִ֔ים וַיִּרְבּוּ֙ הַיָּמִ֔ים וַיִּֽהְי֖וּ עֶשְׂרִ֣ים שָׁנָ֑ה וַיִּנָּה֛וּ כָּל־בֵּ֥ית יִשְׂרָאֵ֖ל אַחֲרֵ֥י יְהוָֽה׃ ס wayehiy miyowm shevet haʾarown beqireyat yeʿariym wayirebu hayamiym wayiheyu ʿeseriym shanah wayinahu kal־beyt yiseraʾel ʾaḥarey yehwah׃ s

³ וַיֹּ֣אמֶר שְׁמוּאֵ֗ל אֶל־כָּל־בֵּ֣ית יִשְׂרָאֵל֮ לֵאמֹר֒ אִם־בְּכָל־לְבַבְכֶ֗ם אַתֶּ֤ם שָׁבִים֙ אֶל־יְהוָ֔ה הָסִ֜ירוּ אֶת־אֱלֹהֵ֧י הַנֵּכָ֛ר מִתֹּוכְכֶ֖ם וְהָעַשְׁתָּרֹ֑ות וְהָכִ֨ינוּ לְבַבְכֶ֤ם אֶל־יְהוָה֙ וְעִבְדֻ֣הוּ לְבַדֹּ֔ו וְיַצֵּ֥ל אֶתְכֶ֖ם מִיַּ֥ד פְּלִשְׁתִּֽים׃ wayoʾmer shemuʾel ʾel־kal־beyt yiseraʾel leʾmor ʾim־bekhal־levavekhem ʾatem shaviym ʾel־yehwah hasiyru ʾet־ʾelohey hanekhar mitowkhekhem wehaʿashetarowt wehakhiynu levavekhem ʾel־yehwah weʿiveduhu levadow weyatsel ʾetekhem miyad pelishetiym׃

⁴ וַיָּסִ֙ירוּ֙ בְּנֵ֣י יִשְׂרָאֵ֔ל אֶת־הַבְּעָלִ֖ים וְאֶת־הָעַשְׁתָּרֹ֑ת וַיַּעַבְד֥וּ אֶת־יְהוָ֖ה לְבַדֹּֽו׃ פ wayasiyru beney yiseraʾel ʾet־habeʿaliym weʾet־haʿashetarot wayaʿavedu ʾet־yehwah levadow׃ f

⁵ וַיֹּ֣אמֶר שְׁמוּאֵ֔ל קִבְצ֥וּ אֶת־כָּל־יִשְׂרָאֵ֖ל הַמִּצְפָּ֑תָה וְאֶתְפַּלֵּ֥ל בַּעַדְכֶ֖ם אֶל־יְהוָֽה׃ wayoʾmer shemuʾel qivetsu ʾet־kal־yiseraʾel hamitsepatah weʾetepalel baʿadekhem ʾel־yehwah׃

⁶ וַיִּקָּבְצ֣וּ הַ֠מִּצְפָּתָה וַיִּֽשְׁאֲבוּ־מַ֜יִם וַֽיִּשְׁפְּכ֣וּ ׀ לִפְנֵ֣י יְהוָ֗ה וַיָּצ֙וּמוּ֙ בַּיֹּ֣ום הַה֔וּא וַיֹּ֣אמְרוּ שָׁ֔ם חָטָ֖אנוּ לַיהוָ֑ה וַיִּשְׁפֹּ֧ט שְׁמוּאֵ֛ל אֶת־בְּנֵ֥י יִשְׂרָאֵ֖ל בַּמִּצְפָּֽה׃ wayiqavetsu hamitsepatah wayisheʾavu־mayim wayishepekhu ׀ lifeney yehwah wayatsumu bayowm hahuʾ wayoʾmeru sham ḥaṭaʾnu layhwah wayishepoṭ shemuʾel ʾet־beney yiseraʾel bamitsepah׃

⁷ וַיִּשְׁמְע֣וּ פְלִשְׁתִּ֗ים כִּֽי־הִתְקַבְּצ֤וּ בְנֵֽי־יִשְׂרָאֵל֙ הַמִּצְפָּ֔תָה וַיַּעֲל֥וּ סַרְנֵֽי־פְלִשְׁתִּ֖ים אֶל־יִשְׂרָאֵ֑ל וַֽיִּשְׁמְעוּ֙ בְּנֵ֣י יִשְׂרָאֵ֔ל וַיִּֽרְא֖וּ מִפְּנֵ֥י פְלִשְׁתִּֽים׃ wayishemeʿu felishetiym kiy־hiteqabetsu veney־yiseraʾel hamitsepatah wayaʿalu sareney־felishetiym ʾel־yiseraʾel wayishemeʿu beney yiseraʾel wayireʾu mipeney felishetiym׃

⁸ וַיֹּאמְר֤וּ בְנֵֽי־יִשְׂרָאֵל֙ אֶל־שְׁמוּאֵ֔ל אַל־תַּחֲרֵ֣שׁ מִמֶּ֔נּוּ מִזְּעֹ֖ק אֶל־יְהוָ֣ה אֱלֹהֵ֑ינוּ וְיֹשִׁעֵ֖נוּ מִיַּ֥ד פְּלִשְׁתִּֽים׃ wayoʾmeru veney־yiseraʾel ʾel־shemuʾel ʾal־taḥaresh mimenu mizeʿoq ʾel־yehwah ʾeloheynu weyoshiʿenu miyad pelishetiym׃

⁹ וַיִּקַּ֣ח שְׁמוּאֵ֗ל טְלֵ֤ה חָלָב֙ אֶחָ֔ד [וַיַּעֲלֶה כ] (וַיַּעֲלֵ֧הוּ ק) עֹולָ֛ה כָּלִ֖יל לַֽיהוָ֑ה וַיִּזְעַ֨ק שְׁמוּאֵ֤ל אֶל־יְהוָה֙ בְּעַ֣ד יִשְׂרָאֵ֔ל וַֽיַּעֲנֵ֖הוּ יְהוָֽה׃ wayiqaḥ shemuʾel ṭeleh ḥalav ʾeḥad [wayaʿaleh kh] (wayaʿalehu q) ʿowlah kaliyl layhwah wayizeʿaq shemuʾel ʾel־yehwah beʿad yiseraʾel wayaʿanehu yehwah׃

¹⁰ וַיְהִ֤י שְׁמוּאֵל֙ מַעֲלֶ֣ה הָעֹולָ֔ה וּפְלִשְׁתִּ֣ים נִגְּשׁ֔וּ לַמִּלְחָמָ֖ה בְּיִשְׂרָאֵ֑ל וַיַּרְעֵ֣ם יְהוָ֣ה ׀ בְּקֹול־גָּ֠דֹול בַּיֹּ֨ום הַה֤וּא עַל־פְּלִשְׁתִּים֙ וַיְהֻמֵּ֔ם וַיִּנָּגְפ֖וּ לִפְנֵ֥י יִשְׂרָאֵֽל׃ wayehiy shemuʾel maʿaleh haʿowlah ufelishetiym nigeshu lamileḥamah beyiseraʾel wayareʿem yehwah ׀ beqowl־gadowl bayowm hahuʾ ʿal־pelishetiym wayehumem wayinagefu lifeney yiseraʾel׃

¹¹ וַיֵּ֨צְא֜וּ אַנְשֵׁ֤י יִשְׂרָאֵל֙ מִן־הַמִּצְפָּ֔ה וַֽיִּרְדְּפ֖וּ אֶת־פְּלִשְׁתִּ֑ים וַיַּכּ֕וּם עַד־מִתַּ֖חַת לְבֵ֥ית כָּֽר׃ wayetseʾu ʾaneshey yiseraʾel min־hamitsepah wayiredefu ʾet־pelishetiym wayakum ʿad־mitaḥat leveyt kar׃

¹² וַיִּקַּ֨ח שְׁמוּאֵ֜ל אֶ֣בֶן אַחַ֗ת וַיָּ֤שֶׂם בֵּֽין־הַמִּצְפָּה֙ וּבֵ֣ין הַשֵּׁ֔ן וַיִּקְרָ֥א אֶת־שְׁמָ֖הּ אֶ֣בֶן הָעָ֑זֶר וַיֹּאמַ֕ר עַד־הֵ֖נָּה עֲזָרָ֥נוּ יְהוָֽה׃ wayiqaḥ shemuʾel ʾeven ʾaḥat wayasem beyn־hamitsepah uveyn hashen wayiqeraʾ ʾet־shemah ʾeven haʿazer wayoʾmar ʿad־henah ʿazaranu yehwah׃

¹³ וַיִּכָּֽנְעוּ֙ הַפְּלִשְׁתִּ֔ים וְלֹא־יָסְפ֣וּ עֹ֔וד לָבֹ֖וא בִּגְב֣וּל יִשְׂרָאֵ֑ל וַתְּהִ֤י יַד־יְהוָה֙ בַּפְּלִשְׁתִּ֔ים כֹּ֖ל יְמֵ֥י שְׁמוּאֵֽל׃ wayikaneʿu hapelishetiym weloʾ־yasefu ʿowd lavowʾ bigevul yiseraʾel watehiy yad־yehwah bapelishetiym kol yemey shemuʾel׃

¹⁴ וַתָּשֹׁ֣בְנָה הֶעָרִ֡ים אֲשֶׁ֣ר לָֽקְחוּ־פְלִשְׁתִּים֩ מֵאֵ֨ת יִשְׂרָאֵ֤ל ׀ לְיִשְׂרָאֵל֙ מֵעֶקְרֹ֣ון וְעַד־גַּ֔ת וְאֶ֨ת־גְּבוּלָ֔ן הִצִּ֥יל יִשְׂרָאֵ֖ל מִיַּ֣ד פְּלִשְׁתִּ֑ים וַיְהִ֣י שָׁלֹ֔ום בֵּ֥ין יִשְׂרָאֵ֖ל וּבֵ֥ין הָאֱמֹרִֽי׃ watashovenah heʿariym ʾasher laqeḥu־felishetiym meʾet yiseraʾel ׀ leyiseraʾel meʿeqerown weʿad־gat weʾet־gevulan hitsiyl yiseraʾel miyad pelishetiym wayehiy shalowm beyn yiseraʾel uveyn haʾemoriy׃

¹⁵ וַיִּשְׁפֹּ֤ט שְׁמוּאֵל֙ אֶת־יִשְׂרָאֵ֔ל כֹּ֖ל יְמֵ֥י חַיָּֽיו׃ wayishepoṭ shemuʾel ʾet־yiseraʾel kol yemey ḥayayw׃

¹⁶ וְהָלַ֗ךְ מִדֵּ֤י שָׁנָה֙ בְּשָׁנָ֔ה וְסָבַב֙ בֵּֽית־אֵ֔ל וְהַגִּלְגָּ֖ל וְהַמִּצְפָּ֑ה וְשָׁפַט֙ אֶת־יִשְׂרָאֵ֔ל אֵ֥ת כָּל־הַמְּקֹומֹ֖ות הָאֵֽלֶּה׃ wehalakhe midey shanah beshanah wesavav beyt־ʾel wehagilegal wehamitsepah weshafaṭ ʾet־yiseraʾel ʾet kal־hameqowmowt haʾeleh׃

¹⁷ וּתְשֻׁבָתֹ֤ו הָרָמָ֙תָה֙ כִּֽי־שָׁ֣ם בֵּיתֹ֔ו וְשָׁ֖ם שָׁפָ֣ט אֶת־יִשְׂרָאֵ֑ל וַיִּֽבֶן־שָׁ֥ם מִזְבֵּ֖חַ לַֽיהוָֽה׃ פ uteshuvatow haramatah kiy־sham beytow wesham shafaṭ ʾet־yiseraʾel wayiven־sham mizebeaḥ layhwah׃ f