1 וַיֵּ֥רַע אֶל־יֹונָ֖ה רָעָ֣ה גְדֹולָ֑ה וַיִּ֖חַר לֹֽו׃ wayeraʿ ʾel־yownah raʿah gedowlah wayiḥar low׃
2 וַיִּתְפַּלֵּ֨ל אֶל־יְהוָ֜ה וַיֹּאמַ֗ר אָנָּ֤ה יְהוָה֙ הֲלֹוא־זֶ֣ה דְבָרִ֗י עַד־הֱיֹותִי֙ עַל־אַדְמָתִ֔י עַל־כֵּ֥ן קִדַּ֖מְתִּי לִבְרֹ֣חַ תַּרְשִׁ֑ישָׁה כִּ֣י יָדַ֗עְתִּי כִּ֤י אַתָּה֙ אֵֽל־חַנּ֣וּן וְרַח֔וּם אֶ֤רֶךְ אַפַּ֙יִם֙ וְרַב־חֶ֔סֶד וְנִחָ֖ם עַל־הָרָעָֽה׃ wayitepalel ʾel־yehwah wayoʾmar ʾanah yehwah halowʾ־zeh devariy ʿad־heyowtiy ʿal־ʾadematiy ʿal־ken qidametiy liveroaḥ tareshiyshah kiy yadaʿetiy kiy ʾatah ʾel־ḥanun weraḥum ʾerekhe ʾapayim werav־ḥesed weniḥam ʿal־haraʿah׃
3 וְעַתָּ֣ה יְהוָ֔ה קַח־נָ֥א אֶת־נַפְשִׁ֖י מִמֶּ֑נִּי כִּ֛י טֹ֥וב מֹותִ֖י מֵחַיָּֽי׃ ס weʿatah yehwah qaḥ־naʾ ʾet־nafeshiy mimeniy kiy ṭowv mowtiy meḥayay׃ s
4 וַיֹּ֣אמֶר יְהוָ֔ה הַהֵיטֵ֖ב חָ֥רָה לָֽךְ׃ wayoʾmer yehwah haheyṭev ḥarah lakhe׃
5 וַיֵּצֵ֤א יֹונָה֙ מִן־הָעִ֔יר וַיֵּ֖שֶׁב מִקֶּ֣דֶם לָעִ֑יר וַיַּעַשׂ֩ לֹ֨ו שָׁ֜ם סֻכָּ֗ה וַיֵּ֤שֶׁב תַּחְתֶּ֙יהָ֙ בַּצֵּ֔ל עַ֚ד אֲשֶׁ֣ר יִרְאֶ֔ה מַה־יִּהְיֶ֖ה בָּעִֽיר׃ wayetseʾ yownah min־haʿiyr wayeshev miqedem laʿiyr wayaʿas low sham sukah wayeshev taḥeteyha batsel ʿad ʾasher yireʾeh mah־yiheyeh baʿiyr׃
6 וַיְמַ֣ן יְהוָֽה־אֱ֠לֹהִים קִיקָיֹ֞ון וַיַּ֣עַל ׀ מֵעַ֣ל לְיֹונָ֗ה לִֽהְיֹ֥ות צֵל֙ עַל־רֹאשֹׁ֔ו לְהַצִּ֥יל לֹ֖ו מֵרָֽעָתֹ֑ו וַיִּשְׂמַ֥ח יֹונָ֛ה עַל־הַקִּֽיקָיֹ֖ון שִׂמְחָ֥ה גְדֹולָֽה׃ wayeman yehwah־ʾelohiym qiyqayown wayaʿal ׀ meʿal leyownah liheyowt tsel ʿal־roʾshow lehatsiyl low meraʿatow wayisemaḥ yownah ʿal־haqiyqayown simeḥah gedowlah׃
7 וַיְמַ֤ן הָֽאֱלֹהִים֙ תֹּולַ֔עַת בַּעֲלֹ֥ות הַשַּׁ֖חַר לַֽמָּחֳרָ֑ת וַתַּ֥ךְ אֶת־הַקִּֽיקָיֹ֖ון וַיִּיבָֽשׁ׃ wayeman haʾelohiym towlaʿat baʿalowt hashaḥar lamaḥorat watakhe ʾet־haqiyqayown wayiyvash׃
8 וַיְהִ֣י ׀ כִּזְרֹ֣חַ הַשֶּׁ֗מֶשׁ וַיְמַ֨ן אֱלֹהִ֜ים ר֤וּחַ קָדִים֙ חֲרִישִׁ֔ית וַתַּ֥ךְ הַשֶּׁ֛מֶשׁ עַל־רֹ֥אשׁ יֹונָ֖ה וַיִּתְעַלָּ֑ף וַיִּשְׁאַ֤ל אֶת־נַפְשֹׁו֙ לָמ֔וּת וַיֹּ֕אמֶר טֹ֥וב מֹותִ֖י מֵחַיָּֽי׃ wayehiy ׀ kizeroaḥ hashemesh wayeman ʾelohiym ruaḥ qadiym ḥariyshiyt watakhe hashemesh ʿal־roʾsh yownah wayiteʿalaf wayisheʾal ʾet־nafeshow lamut wayoʾmer ṭowv mowtiy meḥayay׃
9 וַיֹּ֤אמֶר אֱלֹהִים֙ אֶל־יֹונָ֔ה הַהֵיטֵ֥ב חָרָֽה־לְךָ֖ עַל־הַקִּֽיקָיֹ֑ון וַיֹּ֕אמֶר הֵיטֵ֥ב חָֽרָה־לִ֖י עַד־מָֽוֶת׃ wayoʾmer ʾelohiym ʾel־yownah haheyṭev ḥarah־lekha ʿal־haqiyqayown wayoʾmer heyṭev ḥarah־liy ʿad־mawet׃
10 וַיֹּ֣אמֶר יְהוָ֔ה אַתָּ֥ה חַ֙סְתָּ֙ עַל־הַקִּ֣יקָיֹ֔ון אֲשֶׁ֛ר לֹא־עָמַ֥לְתָּ בֹּ֖ו וְלֹ֣א גִדַּלְתֹּ֑ו שֶׁבִּן־לַ֥יְלָה הָיָ֖ה וּבִן־לַ֥יְלָה אָבָֽד׃ wayoʾmer yehwah ʾatah ḥaseta ʿal־haqiyqayown ʾasher loʾ־ʿamaleta bow weloʾ gidaletow shebin־layelah hayah uvin־layelah ʾavad׃
11 וַֽאֲנִי֙ לֹ֣א אָח֔וּס עַל־נִינְוֵ֖ה הָעִ֣יר הַגְּדֹולָ֑ה אֲשֶׁ֣ר יֶשׁ־בָּ֡הּ הַרְבֵּה֩ מִֽשְׁתֵּים־עֶשְׂרֵ֨ה רִבֹּ֜ו אָדָ֗ם אֲשֶׁ֤ר לֹֽא־יָדַע֙ בֵּין־יְמִינֹ֣ו לִשְׂמֹאלֹ֔ו וּבְהֵמָ֖ה רַבָּֽה׃ waʾaniy loʾ ʾaḥus ʿal־niyneweh haʿiyr hagedowlah ʾasher yesh־bah harebeh misheteym־ʿesereh ribow ʾadam ʾasher loʾ־yadaʿ beyn־yemiynow lisemoʾlow uvehemah rabah׃