1 בַּחֹ֙דֶשׁ֙ הַשְּׁלִישִׁ֔י לְצֵ֥את בְּנֵי־יִשְׂרָאֵ֖ל מֵאֶ֣רֶץ מִצְרָ֑יִם בַּיֹּ֣ום הַזֶּ֔ה בָּ֖אוּ מִדְבַּ֥ר סִינָֽי׃ baḥodesh hasheliyshiy letseʾt beney־yiseraʾel meʾerets mitserayim bayowm hazeh baʾu midebar siynay׃
2 וַיִּסְע֣וּ מֵרְפִידִ֗ים וַיָּבֹ֙אוּ֙ מִדְבַּ֣ר סִינַ֔י וַֽיַּחֲנ֖וּ בַּמִּדְבָּ֑ר וַיִּֽחַן־שָׁ֥ם יִשְׂרָאֵ֖ל נֶ֥גֶד הָהָֽר׃ wayiseʿu merefiydiym wayavoʾu midebar siynay wayaḥanu bamidebar wayiḥan־sham yiseraʾel neged hahar׃
3 וּמֹשֶׁ֥ה עָלָ֖ה אֶל־הָאֱלֹהִ֑ים וַיִּקְרָ֨א אֵלָ֤יו יְהוָה֙ מִן־הָהָ֣ר לֵאמֹ֔ר כֹּ֤ה תֹאמַר֙ לְבֵ֣ית יַעֲקֹ֔ב וְתַגֵּ֖יד לִבְנֵ֥י יִשְׂרָאֵֽל׃ umosheh ʿalah ʾel־haʾelohiym wayiqeraʾ ʾelayw yehwah min־hahar leʾmor koh toʾmar leveyt yaʿaqov wetageyd liveney yiseraʾel׃
4 אַתֶּ֣ם רְאִיתֶ֔ם אֲשֶׁ֥ר עָשִׂ֖יתִי לְמִצְרָ֑יִם וָאֶשָּׂ֤א אֶתְכֶם֙ עַל־כַּנְפֵ֣י נְשָׁרִ֔ים וָאָבִ֥א אֶתְכֶ֖ם אֵלָֽי׃ ʾatem reʾiytem ʾasher ʿasiytiy lemitserayim waʾesaʾ ʾetekhem ʿal־kanefey neshariym waʾaviʾ ʾetekhem ʾelay׃
5 וְעַתָּ֗ה אִם־שָׁמֹ֤ועַ תִּשְׁמְעוּ֙ בְּקֹלִ֔י וּשְׁמַרְתֶּ֖ם אֶת־בְּרִיתִ֑י וִהְיִ֨יתֶם לִ֤י סְגֻלָּה֙ מִכָּל־הָ֣עַמִּ֔ים כִּי־לִ֖י כָּל־הָאָֽרֶץ׃ weʿatah ʾim־shamowʿa tishemeʿu beqoliy ushemaretem ʾet־beriytiy wiheyiytem liy segulah mikal־haʿamiym kiy־liy kal־haʾarets׃
6 וְאַתֶּ֧ם תִּהְיוּ־לִ֛י מַמְלֶ֥כֶת כֹּהֲנִ֖ים וְגֹ֣וי קָדֹ֑ושׁ אֵ֚לֶּה הַדְּבָרִ֔ים אֲשֶׁ֥ר תְּדַבֵּ֖ר אֶל־בְּנֵ֥י יִשְׂרָאֵֽל׃ weʾatem tiheyu־liy mamelekhet kohaniym wegowy qadowsh ʾeleh hadevariym ʾasher tedaber ʾel־beney yiseraʾel׃
7 וַיָּבֹ֣א מֹשֶׁ֔ה וַיִּקְרָ֖א לְזִקְנֵ֣י הָעָ֑ם וַיָּ֣שֶׂם לִפְנֵיהֶ֗ם אֵ֚ת כָּל־הַדְּבָרִ֣ים הָאֵ֔לֶּה אֲשֶׁ֥ר צִוָּ֖הוּ יְהוָֽה׃ wayavoʾ mosheh wayiqeraʾ leziqeney haʿam wayasem lifeneyhem ʾet kal־hadevariym haʾeleh ʾasher tsiuahu yehwah׃
8 וַיַּעֲנ֨וּ כָל־הָעָ֤ם יַחְדָּו֙ וַיֹּ֣אמְר֔וּ כֹּ֛ל אֲשֶׁר־דִּבֶּ֥ר יְהוָ֖ה נַעֲשֶׂ֑ה וַיָּ֧שֶׁב מֹשֶׁ֛ה אֶת־דִּבְרֵ֥י הָעָ֖ם אֶל־יְהוָֽה׃ wayaʿanu khal־haʿam yaḥedaw wayoʾmeru kol ʾasher־diber yehwah naʿaseh wayashev mosheh ʾet־diverey haʿam ʾel־yehwah׃
9 וַיֹּ֨אמֶר יְהוָ֜ה אֶל־מֹשֶׁ֗ה הִנֵּ֨ה אָנֹכִ֜י בָּ֣א אֵלֶיךָ֮ בְּעַ֣ב הֶֽעָנָן֒ בַּעֲב֞וּר יִשְׁמַ֤ע הָעָם֙ בְּדַבְּרִ֣י עִמָּ֔ךְ וְגַם־בְּךָ֖ יַאֲמִ֣ינוּ לְעֹולָ֑ם וַיַּגֵּ֥ד מֹשֶׁ֛ה אֶת־דִּבְרֵ֥י הָעָ֖ם אֶל־יְהוָֽה׃ wayoʾmer yehwah ʾel־mosheh hineh ʾanokhiy baʾ ʾeleykha beʿav heʿanan baʿavur yishemaʿ haʿam bedaberiy ʿimakhe wegam־bekha yaʾamiynu leʿowlam wayaged mosheh ʾet־diverey haʿam ʾel־yehwah׃
10 וַיֹּ֨אמֶר יְהוָ֤ה אֶל־מֹשֶׁה֙ לֵ֣ךְ אֶל־הָעָ֔ם וְקִדַּשְׁתָּ֥ם הַיֹּ֖ום וּמָחָ֑ר וְכִבְּס֖וּ שִׂמְלֹתָֽם׃ wayoʾmer yehwah ʾel־mosheh lekhe ʾel־haʿam weqidashetam hayowm umaḥar wekhibesu simelotam׃
11 וְהָי֥וּ נְכֹנִ֖ים לַיֹּ֣ום הַשְּׁלִישִׁ֑י כִּ֣י ׀ בַּיֹּ֣ום הַשְּׁלִישִׁ֗י יֵרֵ֧ד יְהוָ֛ה לְעֵינֵ֥י כָל־הָעָ֖ם עַל־הַ֥ר סִינָֽי׃ wehayu nekhoniym layowm hasheliyshiy kiy ׀ bayowm hasheliyshiy yered yehwah leʿeyney khal־haʿam ʿal־har siynay׃
12 וְהִגְבַּלְתָּ֤ אֶת־הָעָם֙ סָבִ֣יב לֵאמֹ֔ר הִשָּׁמְר֥וּ לָכֶ֛ם עֲלֹ֥ות בָּהָ֖ר וּנְגֹ֣עַ בְּקָצֵ֑הוּ כָּל־הַנֹּגֵ֥עַ בָּהָ֖ר מֹ֥ות יוּמָֽת׃ wehigebaleta ʾet־haʿam saviyv leʾmor hishameru lakhem ʿalowt bahar unegoaʿ beqatsehu kal־hanogeaʿ bahar mowt yumat׃
13 לֹא־תִגַּ֨ע בֹּ֜ו יָ֗ד כִּֽי־סָקֹ֤ול יִסָּקֵל֙ אֹו־יָרֹ֣ה יִיָּרֶ֔ה אִם־בְּהֵמָ֥ה אִם־אִ֖ישׁ לֹ֣א יִחְיֶ֑ה בִּמְשֹׁךְ֙ הַיֹּבֵ֔ל הֵ֖מָּה יַעֲל֥וּ בָהָֽר׃ loʾ־tigaʿ bow yad kiy־saqowl yisaqel ʾow־yaroh yiyareh ʾim־behemah ʾim־ʾiysh loʾ yiḥeyeh bimeshokhe hayovel hemah yaʿalu vahar׃
14 וַיֵּ֧רֶד מֹשֶׁ֛ה מִן־הָהָ֖ר אֶל־הָעָ֑ם וַיְקַדֵּשׁ֙ אֶת־הָעָ֔ם וַֽיְכַבְּס֖וּ שִׂמְלֹתָֽם׃ wayered mosheh min־hahar ʾel־haʿam wayeqadesh ʾet־haʿam wayekhabesu simelotam׃
15 וַיֹּ֙אמֶר֙ אֶל־הָעָ֔ם הֱי֥וּ נְכֹנִ֖ים לִשְׁלֹ֣שֶׁת יָמִ֑ים אַֽל־תִּגְּשׁ֖וּ אֶל־אִשָּֽׁה׃ wayoʾmer ʾel־haʿam heyu nekhoniym lisheloshet yamiym ʾal־tigeshu ʾel־ʾishah׃
16 וַיְהִי֩ בַיֹּ֨ום הַשְּׁלִישִׁ֜י בִּֽהְיֹ֣ת הַבֹּ֗קֶר וַיְהִי֩ קֹלֹ֨ת וּבְרָקִ֜ים וְעָנָ֤ן כָּבֵד֙ עַל־הָהָ֔ר וְקֹ֥ל שֹׁפָ֖ר חָזָ֣ק מְאֹ֑ד וַיֶּחֱרַ֥ד כָּל־הָעָ֖ם אֲשֶׁ֥ר בַּֽמַּחֲנֶֽה׃ wayehiy vayowm hasheliyshiy biheyot haboqer wayehiy qolot uveraqiym weʿanan kaved ʿal־hahar weqol shofar ḥazaq meʾod wayeḥerad kal־haʿam ʾasher bamaḥaneh׃
17 וַיֹּוצֵ֨א מֹשֶׁ֧ה אֶת־הָעָ֛ם לִקְרַ֥את הָֽאֱלֹהִ֖ים מִן־הַֽמַּחֲנֶ֑ה וַיִּֽתְיַצְּב֖וּ בְּתַחְתִּ֥ית הָהָֽר׃ wayowtseʾ mosheh ʾet־haʿam liqeraʾt haʾelohiym min־hamaḥaneh wayiteyatsevu betaḥetiyt hahar׃
18 וְהַ֤ר סִינַי֙ עָשַׁ֣ן כֻּלֹּ֔ו מִ֠פְּנֵי אֲשֶׁ֨ר יָרַ֥ד עָלָ֛יו יְהוָ֖ה בָּאֵ֑שׁ וַיַּ֤עַל עֲשָׁנֹו֙ כְּעֶ֣שֶׁן הַכִּבְשָׁ֔ן וַיֶּחֱרַ֥ד כָּל־הָהָ֖ר מְאֹֽד׃ wehar siynay ʿashan kulow mipeney ʾasher yarad ʿalayw yehwah baʾesh wayaʿal ʿashanow keʿeshen hakiveshan wayeḥerad kal־hahar meʾod׃
19 וַיְהִי֙ קֹ֣ול הַשֹּׁופָ֔ר הֹולֵ֖ךְ וְחָזֵ֣ק מְאֹ֑ד מֹשֶׁ֣ה יְדַבֵּ֔ר וְהָאֱלֹהִ֖ים יַעֲנֶ֥נּוּ בְקֹֽול׃ wayehiy qowl hashowfar howlekhe weḥazeq meʾod mosheh yedaber wehaʾelohiym yaʿanenu veqowl׃
20 וַיֵּ֧רֶד יְהוָ֛ה עַל־הַ֥ר סִינַ֖י אֶל־רֹ֣אשׁ הָהָ֑ר וַיִּקְרָ֨א יְהוָ֧ה לְמֹשֶׁ֛ה אֶל־רֹ֥אשׁ הָהָ֖ר וַיַּ֥עַל מֹשֶֽׁה׃ wayered yehwah ʿal־har siynay ʾel־roʾsh hahar wayiqeraʾ yehwah lemosheh ʾel־roʾsh hahar wayaʿal mosheh׃
21 וַיֹּ֤אמֶר יְהוָה֙ אֶל־מֹשֶׁ֔ה רֵ֖ד הָעֵ֣ד בָּעָ֑ם פֶּן־יֶהֶרְס֤וּ אֶל־יְהוָה֙ לִרְאֹ֔ות וְנָפַ֥ל מִמֶּ֖נּוּ רָֽב׃ wayoʾmer yehwah ʾel־mosheh red haʿed baʿam pen־yeheresu ʾel־yehwah lireʾowt wenafal mimenu rav׃
22 וְגַ֧ם הַכֹּהֲנִ֛ים הַנִּגָּשִׁ֥ים אֶל־יְהוָ֖ה יִתְקַדָּ֑שׁוּ פֶּן־יִפְרֹ֥ץ בָּהֶ֖ם יְהוָֽה׃ wegam hakohaniym hanigashiym ʾel־yehwah yiteqadashu pen־yiferots bahem yehwah׃
23 וַיֹּ֤אמֶר מֹשֶׁה֙ אֶל־יְהוָ֔ה לֹא־יוּכַ֣ל הָעָ֔ם לַעֲלֹ֖ת אֶל־הַ֣ר סִינָ֑י כִּֽי־אַתָּ֞ה הַעֵדֹ֤תָה בָּ֙נוּ֙ לֵאמֹ֔ר הַגְבֵּ֥ל אֶת־הָהָ֖ר וְקִדַּשְׁתֹּֽו׃ wayoʾmer mosheh ʾel־yehwah loʾ־yukhal haʿam laʿalot ʾel־har siynay kiy־ʾatah haʿedotah banu leʾmor hagebel ʾet־hahar weqidashetow׃
24 וַיֹּ֨אמֶר אֵלָ֤יו יְהוָה֙ לֶךְ־רֵ֔ד וְעָלִ֥יתָ אַתָּ֖ה וְאַהֲרֹ֣ן עִמָּ֑ךְ וְהַכֹּהֲנִ֣ים וְהָעָ֗ם אַל־יֶֽהֶרְס֛וּ לַעֲלֹ֥ת אֶל־יְהוָ֖ה פֶּן־יִפְרָץ־בָּֽם׃ wayoʾmer ʾelayw yehwah lekhe־red weʿaliyta ʾatah weʾaharon ʿimakhe wehakohaniym wehaʿam ʾal־yeheresu laʿalot ʾel־yehwah pen־yiferats־bam׃
25 וַיֵּ֥רֶד מֹשֶׁ֖ה אֶל־הָעָ֑ם וַיֹּ֖אמֶר אֲלֵהֶֽם׃ ס wayered mosheh ʾel־haʿam wayoʾmer ʾalehem׃ s