Josué 22

¹ אָ֚ז יִקְרָ֣א יְהֹושֻׁ֔עַ לָרֽאוּבֵנִ֖י וְלַגָּדִ֑י וְלַחֲצִ֖י מַטֵּ֥ה מְנַשֶּֽׁה׃ ʾaz yiqeraʾ yehowshuaʿ larʾuveniy welagadiy welaḥatsiy maṭeh menasheh׃

² וַיֹּ֣אמֶר אֲלֵיהֶ֔ם אַתֶּ֣ם שְׁמַרְתֶּ֔ם אֵ֚ת כָּל־אֲשֶׁ֣ר צִוָּ֣ה אֶתְכֶ֔ם מֹשֶׁ֖ה עֶ֣בֶד יְהוָ֑ה וַתִּשְׁמְע֣וּ בְקֹולִ֔י לְכֹ֥ל אֲשֶׁר־צִוִּ֖יתִי אֶתְכֶֽם׃ wayoʾmer ʾaleyhem ʾatem shemaretem ʾet kal־ʾasher tsiuah ʾetekhem mosheh ʿeved yehwah watishemeʿu veqowliy lekhol ʾasher־tsiuiytiy ʾetekhem׃

³ לֹֽא־עֲזַבְתֶּ֣ם אֶת־אֲחֵיכֶ֗ם זֶ֚ה יָמִ֣ים רַבִּ֔ים עַ֖ד הַיֹּ֣ום הַזֶּ֑ה וּשְׁמַרְתֶּ֕ם אֶת־מִשְׁמֶ֕רֶת מִצְוַ֖ת יְהוָ֥ה אֱלֹהֵיכֶֽם׃ loʾ־ʿazavetem ʾet־ʾaḥeykhem zeh yamiym rabiym ʿad hayowm hazeh ushemaretem ʾet־mishemeret mitsewat yehwah ʾeloheykhem׃

⁴ וְעַתָּ֗ה הֵנִ֨יחַ יְהוָ֤ה אֱלֹֽהֵיכֶם֙ לַֽאֲחֵיכֶ֔ם כַּאֲשֶׁ֖ר דִּבֶּ֣ר לָהֶ֑ם וְעַתָּ֡ה פְּנוּ֩ וּלְכ֨וּ לָכֶ֜ם לְאָהֳלֵיכֶ֗ם אֶל־אֶ֙רֶץ֙ אֲחֻזַּתְכֶ֔ם אֲשֶׁ֣ר ׀ נָתַ֣ן לָכֶ֗ם מֹשֶׁה֙ עֶ֣בֶד יְהוָ֔ה בְּעֵ֖בֶר הַיַּרְדֵּֽן׃ weʿatah heniyḥa yehwah ʾeloheykhem laʾaḥeykhem kaʾasher diber lahem weʿatah penu ulekhu lakhem leʾaholeykhem ʾel־ʾerets ʾaḥuzatekhem ʾasher ׀ natan lakhem mosheh ʿeved yehwah beʿever hayareden׃

⁵ רַ֣ק ׀ שִׁמְר֣וּ מְאֹ֗ד לַעֲשֹׂ֨ות אֶת־הַמִּצְוָ֣ה וְאֶת־הַתֹּורָה֮ אֲשֶׁ֣ר צִוָּ֣ה אֶתְכֶם֮ מֹשֶׁ֣ה עֶֽבֶד־יְהוָה֒ לְ֠אַהֲבָה אֶת־יְהוָ֨ה אֱלֹֽהֵיכֶ֜ם וְלָלֶ֧כֶת בְּכָל־דְּרָכָ֛יו וְלִשְׁמֹ֥ר מִצְוֹתָ֖יו וּלְדָבְקָה־בֹ֑ו וּלְעָבְדֹ֕ו בְּכָל־לְבַבְכֶ֖ם וּבְכָל־נַפְשְׁכֶֽם׃ raq ׀ shimeru meʾod laʿasowt ʾet־hamitsewah weʾet־hatowrah ʾasher tsiuah ʾetekhem mosheh ʿeved־yehwah leʾahavah ʾet־yehwah ʾeloheykhem welalekhet bekhal־derakhayw welishemor mitseotayw uledaveqah־vow uleʿavedow bekhal־levavekhem uvekhal־nafeshekhem׃

⁶ וַֽיְבָרְכֵ֖ם יְהֹושֻׁ֑עַ וַֽיְשַׁלְּחֵ֔ם וַיֵּלְכ֖וּ אֶל־אָהֳלֵיהֶֽם׃ ס wayevarekhem yehowshuaʿ wayeshaleḥem wayelekhu ʾel־ʾaholeyhem׃ s

⁷ וְלַחֲצִ֣י ׀ שֵׁ֣בֶט הַֽמְנַשֶּׁ֗ה נָתַ֣ן מֹשֶׁה֮ בַּבָּשָׁן֒ וּלְחֶצְיֹ֗ו נָתַ֤ן יְהֹושֻׁ֙עַ֙ עִם־אֲחֵיהֶ֔ם [מֵעֵבֶר כ] (בְּעֵ֥בֶר ק) הַיַּרְדֵּ֖ן יָ֑מָּה וְ֠גַם כִּ֣י שִׁלְּחָ֧ם יְהֹושֻׁ֛עַ אֶל־אָהֳלֵיהֶ֖ם וַיְבָרֲכֵֽם׃ welaḥatsiy ׀ sheveṭ hamenasheh natan mosheh babashan uleḥetseyow natan yehowshuaʿ ʿim־ʾaḥeyhem [meʿever kh] (beʿever q) hayareden yamah wegam kiy shileḥam yehowshuaʿ ʾel־ʾaholeyhem wayevarakhem׃

⁸ וַיֹּ֨אמֶר אֲלֵיהֶ֜ם לֵאמֹ֗ר בִּנְכָסִ֨ים רַבִּ֜ים שׁ֤וּבוּ אֶל־אָֽהֳלֵיכֶם֙ וּבְמִקְנֶ֣ה רַב־מְאֹ֔ד בְּכֶ֨סֶף וּבְזָהָ֜ב וּבִנְחֹ֧שֶׁת וּבְבַרְזֶ֛ל וּבִשְׂלָמֹ֖ות הַרְבֵּ֣ה מְאֹ֑ד חִלְק֥וּ שְׁלַל־אֹיְבֵיכֶ֖ם עִם־אֲחֵיכֶֽם׃ פ wayoʾmer ʾaleyhem leʾmor binekhasiym rabiym shuvu ʾel־ʾaholeykhem uvemiqeneh rav־meʾod bekhesef uvezahav uvineḥoshet uvevarezel uviselamowt harebeh meʾod ḥilequ shelal־ʾoyeveykhem ʿim־ʾaḥeykhem׃ f

⁹ וַיָּשֻׁ֣בוּ וַיֵּלְכ֡וּ בְּנֵי־רְאוּבֵ֨ן וּבְנֵי־גָ֜ד וַחֲצִ֣י ׀ שֵׁ֣בֶט הַֽמְנַשֶּׁ֗ה מֵאֵת֙ בְּנֵ֣י יִשְׂרָאֵ֔ל מִשִּׁלֹ֖ה אֲשֶׁ֣ר בְּאֶֽרֶץ־כְּנָ֑עַן לָלֶ֜כֶת אֶל־אֶ֣רֶץ הַגִּלְעָ֗ד אֶל־אֶ֤רֶץ אֲחֻזָּתָם֙ אֲשֶׁ֣ר נֹֽאחֲזוּ־בָ֔הּ עַל־פִּ֥י יְהוָ֖ה בְּיַד־מֹשֶֽׁה׃ wayashuvu wayelekhu beney־reʾuven uveney־gad waḥatsiy ׀ sheveṭ hamenasheh meʾet beney yiseraʾel mishiloh ʾasher beʾerets־kenaʿan lalekhet ʾel־ʾerets hagileʿad ʾel־ʾerets ʾaḥuzatam ʾasher noʾḥazu־vah ʿal־piy yehwah beyad־mosheh׃

¹⁰ וַיָּבֹ֙אוּ֙ אֶל־גְּלִילֹ֣ות הַיַּרְדֵּ֔ן אֲשֶׁ֖ר בְּאֶ֣רֶץ כְּנָ֑עַן וַיִּבְנ֣וּ בְנֵי־רְאוּבֵ֣ן וּבְנֵי־גָ֡ד וַחֲצִ֣י שֵׁבֶט֩ הַֽמְנַשֶּׁ֨ה שָׁ֤ם מִזְבֵּ֙חַ֙ עַל־הַיַּרְדֵּ֔ן מִזְבֵּ֥חַ גָּדֹ֖ול לְמַרְאֶֽה׃ wayavoʾu ʾel־geliylowt hayareden ʾasher beʾerets kenaʿan wayivenu veney־reʾuven uveney־gad waḥatsiy sheveṭ hamenasheh sham mizebeaḥ ʿal־hayareden mizebeaḥ gadowl lemareʾeh׃

¹¹ וַיִּשְׁמְע֥וּ בְנֵֽי־יִשְׂרָאֵ֖ל לֵאמֹ֑ר הִנֵּ֣ה בָנ֣וּ בְנֵֽי־רְאוּבֵ֣ן וּבְנֵי־גָ֡ד וַחֲצִי֩ שֵׁ֨בֶט הַֽמְנַשֶּׁ֜ה אֶת־הַמִּזְבֵּ֗חַ אֶל־מוּל֙ אֶ֣רֶץ כְּנַ֔עַן אֶל־גְּלִילֹות֙ הַיַּרְדֵּ֔ן אֶל־עֵ֖בֶר בְּנֵ֥י יִשְׂרָאֵֽל׃ wayishemeʿu veney־yiseraʾel leʾmor hineh vanu veney־reʾuven uveney־gad waḥatsiy sheveṭ hamenasheh ʾet־hamizebeaḥ ʾel־mul ʾerets kenaʿan ʾel־geliylowt hayareden ʾel־ʿever beney yiseraʾel׃

¹² וַֽיִּשְׁמְע֖וּ בְּנֵ֣י יִשְׂרָאֵ֑ל וַיִּקָּ֨הֲל֜וּ כָּל־עֲדַ֤ת בְּנֵֽי־יִשְׂרָאֵל֙ שִׁלֹ֔ה לַעֲלֹ֥ות עֲלֵיהֶ֖ם לַצָּבָֽא׃ פ wayishemeʿu beney yiseraʾel wayiqahalu kal־ʿadat beney־yiseraʾel shiloh laʿalowt ʿaleyhem latsavaʾ׃ f

¹³ וַיִּשְׁלְח֨וּ בְנֵֽי־יִשְׂרָאֵ֜ל אֶל־בְּנֵי־רְאוּבֵ֧ן וְאֶל־בְּנֵי־גָ֛ד וְאֶל־חֲצִ֥י שֵֽׁבֶט־מְנַשֶּׁ֖ה אֶל־אֶ֣רֶץ הַגִּלְעָ֑ד אֶת־פִּינְחָ֖ס בֶּן־אֶלְעָזָ֥ר הַכֹּהֵֽן׃ wayisheleḥu veney־yiseraʾel ʾel־beney־reʾuven weʾel־beney־gad weʾel־ḥatsiy sheveṭ־menasheh ʾel־ʾerets hagileʿad ʾet־piyneḥas ben־ʾeleʿazar hakohen׃

¹⁴ וַעֲשָׂרָ֤ה נְשִׂאִים֙ עִמֹּ֔ו נָשִׂ֨יא אֶחָ֜ד נָשִׂ֤יא אֶחָד֙ לְבֵ֣ית אָ֔ב לְכֹ֖ל מַטֹּ֣ות יִשְׂרָאֵ֑ל וְאִ֨ישׁ רֹ֧אשׁ בֵּית־אֲבֹותָ֛ם הֵ֖מָּה לְאַלְפֵ֥י יִשְׂרָאֵֽל׃ waʿasarah nesiʾiym ʿimow nasiyʾ ʾeḥad nasiyʾ ʾeḥad leveyt ʾav lekhol maṭowt yiseraʾel weʾiysh roʾsh beyt־ʾavowtam hemah leʾalefey yiseraʾel׃

¹⁵ וַיָּבֹ֜אוּ אֶל־בְּנֵי־רְאוּבֵ֧ן וְאֶל־בְּנֵי־גָ֛ד וְאֶל־חֲצִ֥י שֵֽׁבֶט־מְנַשֶּׁ֖ה אֶל־אֶ֣רֶץ הַגִּלְעָ֑ד וַיְדַבְּר֥וּ אִתָּ֖ם לֵאמֹֽר׃ wayavoʾu ʾel־beney־reʾuven weʾel־beney־gad weʾel־ḥatsiy sheveṭ־menasheh ʾel־ʾerets hagileʿad wayedaberu ʾitam leʾmor׃

¹⁶ כֹּ֣ה אָמְר֞וּ כֹּ֣ל ׀ עֲדַ֣ת יְהוָ֗ה מָֽה־הַמַּ֤עַל הַזֶּה֙ אֲשֶׁ֤ר מְעַלְתֶּם֙ בֵּאלֹהֵ֣י יִשְׂרָאֵ֔ל לָשׁ֣וּב הַיֹּ֔ום מֵאַחֲרֵ֖י יְהוָ֑ה בִּבְנֹֽותְכֶ֤ם לָכֶם֙ מִזְבֵּ֔חַ לִמְרָדְכֶ֥ם הַיֹּ֖ום בַּיהוָֽה׃ koh ʾameru kol ׀ ʿadat yehwah mah־hamaʿal hazeh ʾasher meʿaletem beʾlohey yiseraʾel lashuv hayowm meʾaḥarey yehwah bivenowtekhem lakhem mizebeaḥ limeradekhem hayowm bayhwah׃

¹⁷ הַמְעַט־לָ֙נוּ֙ אֶת־עֲוֹ֣ן פְּעֹ֔ור אֲשֶׁ֤ר לֹֽא־הִטַּהַ֙רְנוּ֙ מִמֶּ֔נּוּ עַ֖ד הַיֹּ֣ום הַזֶּ֑ה וַיְהִ֥י הַנֶּ֖גֶף בַּעֲדַ֥ת יְהוָֽה׃ hameʿaṭ־lanu ʾet־ʿaon peʿowr ʾasher loʾ־hiṭaharenu mimenu ʿad hayowm hazeh wayehiy hanegef baʿadat yehwah׃

¹⁸ וְאַתֶּם֙ תָּשֻׁ֣בוּ הַיֹּ֔ום מֵאַחֲרֵ֖י יְהוָ֑ה וְהָיָ֗ה אַתֶּ֞ם תִּמְרְד֤וּ הַיֹּום֙ בַּֽיהוָ֔ה וּמָחָ֕ר אֶֽל־כָּל־עֲדַ֥ת יִשְׂרָאֵ֖ל יִקְצֹֽף׃ weʾatem tashuvu hayowm meʾaḥarey yehwah wehayah ʾatem timeredu hayowm bayhwah umaḥar ʾel־kal־ʿadat yiseraʾel yiqetsof׃

¹⁹ וְאַ֨ךְ אִם־טְמֵאָ֜ה אֶ֣רֶץ אֲחֻזַּתְכֶ֗ם עִבְר֨וּ לָכֶ֜ם אֶל־אֶ֨רֶץ אֲחֻזַּ֤ת יְהוָה֙ אֲשֶׁ֤ר שָֽׁכַן־שָׁם֙ מִשְׁכַּ֣ן יְהוָ֔ה וְהֵאָחֲז֖וּ בְּתֹוכֵ֑נוּ וּבַֽיהוָ֣ה אַל־תִּמְרֹ֗דוּ וְאֹתָ֙נוּ֙ אֶל־תִּמְרֹ֔דוּ בִּבְנֹֽתְכֶ֤ם לָכֶם֙ מִזְבֵּ֔חַ מִֽבַּלְעֲדֵ֔י מִזְבַּ֖ח יְהוָ֥ה אֱלֹהֵֽינוּ׃ weʾakhe ʾim־ṭemeʾah ʾerets ʾaḥuzatekhem ʿiveru lakhem ʾel־ʾerets ʾaḥuzat yehwah ʾasher shakhan־sham mishekan yehwah weheʾaḥazu betowkhenu uvayhwah ʾal־timerodu weʾotanu ʾel־timerodu bivenotekhem lakhem mizebeaḥ mibaleʿadey mizebaḥ yehwah ʾeloheynu׃

²⁰ הֲלֹ֣וא ׀ עָכָ֣ן בֶּן־זֶ֗רַח מָ֤עַל מַ֙עַל֙ בַּחֵ֔רֶם וְעַֽל־כָּל־עֲדַ֥ת יִשְׂרָאֵ֖ל הָ֣יָה קָ֑צֶף וְהוּא֙ אִ֣ישׁ אֶחָ֔ד לֹ֥א גָוַ֖ע בַּעֲוֹנֹֽו׃ פ halowʾ ׀ ʿakhan ben־zeraḥ maʿal maʿal baḥerem weʿal־kal־ʿadat yiseraʾel hayah qatsef wehuʾ ʾiysh ʾeḥad loʾ gawaʿ baʿaonow׃ f

²¹ וַֽיַּעֲנוּ֙ בְּנֵי־רְאוּבֵ֣ן וּבְנֵי־גָ֔ד וַחֲצִ֖י שֵׁ֣בֶט הַֽמְנַשֶּׁ֑ה וַֽיְדַבְּר֔וּ אֶת־רָאשֵׁ֖י אַלְפֵ֥י יִשְׂרָאֵֽל׃ wayaʿanu beney־reʾuven uveney־gad waḥatsiy sheveṭ hamenasheh wayedaberu ʾet־raʾshey ʾalefey yiseraʾel׃

²² אֵל֩ ׀ אֱלֹהִ֨ים ׀ יְהוָ֜ה אֵ֣ל ׀ אֱלֹהִ֤ים ׀ יְהוָה֙ ה֣וּא יֹדֵ֔עַ וְיִשְׂרָאֵ֖ל ה֣וּא יֵדָ֑ע אִם־בְּמֶ֤רֶד וְאִם־בְּמַ֙עַל֙ בַּֽיהוָ֔ה אַל־תֹּושִׁיעֵ֖נוּ הַיֹּ֥ום הַזֶּֽה׃ ʾel ׀ ʾelohiym ׀ yehwah ʾel ׀ ʾelohiym ׀ yehwah huʾ yodeaʿ weyiseraʾel huʾ yedaʿ ʾim־bemered weʾim־bemaʿal bayhwah ʾal־towshiyʿenu hayowm hazeh׃

²³ לִבְנֹ֥ות לָ֙נוּ֙ מִזְבֵּ֔חַ לָשׁ֖וּב מֵאַחֲרֵ֣י יְהוָ֑ה וְאִם־לְהַעֲלֹ֨ות עָלָ֜יו עֹולָ֣ה וּמִנְחָ֗ה וְאִם־לַעֲשֹׂ֤ות עָלָיו֙ זִבְחֵ֣י שְׁלָמִ֔ים יְהוָ֖ה ה֥וּא יְבַקֵּֽשׁ׃ livenowt lanu mizebeaḥ lashuv meʾaḥarey yehwah weʾim־lehaʿalowt ʿalayw ʿowlah umineḥah weʾim־laʿasowt ʿalayw ziveḥey shelamiym yehwah huʾ yevaqesh׃

²⁴ וְאִם־לֹ֤א מִדְּאָגָה֙ מִדָּבָ֔ר עָשִׂ֥ינוּ אֶת־זֹ֖את לֵאמֹ֑ר מָחָ֗ר יֹאמְר֨וּ בְנֵיכֶ֤ם לְבָנֵ֙ינוּ֙ לֵאמֹ֔ר מַה־לָּכֶ֕ם וְלַֽיהוָ֖ה אֱלֹהֵ֥י יִשְׂרָאֵֽל׃ weʾim־loʾ mideʾagah midavar ʿasiynu ʾet־zoʾt leʾmor maḥar yoʾmeru veneykhem levaneynu leʾmor mah־lakhem welayhwah ʾelohey yiseraʾel׃

²⁵ וּגְב֣וּל נָֽתַן־יְ֠הוָה בֵּינֵ֨נוּ וּבֵינֵיכֶ֜ם בְּנֵי־רְאוּבֵ֤ן וּבְנֵי־גָד֙ אֶת־הַיַּרְדֵּ֔ן אֵין־לָכֶ֥ם חֵ֖לֶק בַּֽיהוָ֑ה וְהִשְׁבִּ֤יתוּ בְנֵיכֶם֙ אֶת־בָּנֵ֔ינוּ לְבִלְתִּ֖י יְרֹ֥א אֶת־יְהוָֽה׃ ugevul natan־yehwah beynenu uveyneykhem beney־reʾuven uveney־gad ʾet־hayareden ʾeyn־lakhem ḥeleq bayhwah wehishebiytu veneykhem ʾet־baneynu leviletiy yeroʾ ʾet־yehwah׃

²⁶ וַנֹּ֕אמֶר נַעֲשֶׂה־נָּ֣א לָ֔נוּ לִבְנֹ֖ות אֶת־הַמִּזְבֵּ֑חַ לֹ֥א לְעֹולָ֖ה וְלֹ֥א לְזָֽבַח׃ wanoʾmer naʿaseh־naʾ lanu livenowt ʾet־hamizebeaḥ loʾ leʿowlah weloʾ lezavaḥ׃

²⁷ כִּי֩ עֵ֨ד ה֜וּא בֵּינֵ֣ינוּ וּבֵינֵיכֶ֗ם וּבֵ֣ין דֹּרֹותֵינוּ֮ אַחֲרֵינוּ֒ לַעֲבֹ֞ד אֶת־עֲבֹדַ֤ת יְהוָה֙ לְפָנָ֔יו בְּעֹלֹותֵ֥ינוּ וּבִזְבָחֵ֖ינוּ וּבִשְׁלָמֵ֑ינוּ וְלֹא־יֹאמְר֨וּ בְנֵיכֶ֤ם מָחָר֙ לְבָנֵ֔ינוּ אֵין־לָכֶ֥ם חֵ֖לֶק בַּיהוָֽה׃ kiy ʿed huʾ beyneynu uveyneykhem uveyn dorowteynu ʾaḥareynu laʿavod ʾet־ʿavodat yehwah lefanayw beʿolowteynu uvizevaḥeynu uvishelameynu weloʾ־yoʾmeru veneykhem maḥar levaneynu ʾeyn־lakhem ḥeleq bayhwah׃

²⁸ וַנֹּ֕אמֶר וְהָיָ֗ה כִּֽי־יֹאמְר֥וּ אֵלֵ֛ינוּ וְאֶל־דֹּרֹתֵ֖ינוּ מָחָ֑ר וְאָמַ֡רְנוּ רְא֣וּ אֶת־תַּבְנִית֩ מִזְבַּ֨ח יְהוָ֜ה אֲשֶׁר־עָשׂ֣וּ אֲבֹותֵ֗ינוּ לֹ֤א לְעֹולָה֙ וְלֹ֣א לְזֶ֔בַח כִּי־עֵ֣ד ה֔וּא בֵּינֵ֖ינוּ וּבֵינֵיכֶֽם׃ wanoʾmer wehayah kiy־yoʾmeru ʾeleynu weʾel־doroteynu maḥar weʾamarenu reʾu ʾet־taveniyt mizebaḥ yehwah ʾasher־ʿasu ʾavowteynu loʾ leʿowlah weloʾ lezevaḥ kiy־ʿed huʾ beyneynu uveyneykhem׃

²⁹ חָלִילָה֩ לָּ֨נוּ מִמֶּ֜נּוּ לִמְרֹ֣ד בַּֽיהוָ֗ה וְלָשׁ֤וּב הַיֹּום֙ מֵאַחֲרֵ֣י יְהוָ֔ה לִבְנֹ֣ות מִזְבֵּ֔חַ לְעֹלָ֖ה לְמִנְחָ֣ה וּלְזָ֑בַח מִלְּבַ֗ד מִזְבַּח֙ יְהוָ֣ה אֱלֹהֵ֔ינוּ אֲשֶׁ֖ר לִפְנֵ֥י מִשְׁכָּנֹֽו׃ פ ḥaliylah lanu mimenu limerod bayhwah welashuv hayowm meʾaḥarey yehwah livenowt mizebeaḥ leʿolah lemineḥah ulezavaḥ milevad mizebaḥ yehwah ʾeloheynu ʾasher lifeney mishekanow׃ f

³⁰ וַיִּשְׁמַ֞ע פִּֽינְחָ֣ס הַכֹּהֵ֗ן וּנְשִׂיאֵ֨י הָעֵדָ֜ה וְרָאשֵׁ֨י אַלְפֵ֤י יִשְׂרָאֵל֙ אֲשֶׁ֣ר אִתֹּ֔ו אֶת־הַ֨דְּבָרִ֔ים אֲשֶׁ֧ר דִּבְּר֛וּ בְּנֵי־רְאוּבֵ֥ן וּבְנֵי־גָ֖ד וּבְנֵ֣י מְנַשֶּׁ֑ה וַיִּיטַ֖ב בְּעֵינֵיהֶֽם׃ wayishemaʿ piyneḥas hakohen unesiyʾey haʿedah weraʾshey ʾalefey yiseraʾel ʾasher ʾitow ʾet־hadevariym ʾasher diberu beney־reʾuven uveney־gad uveney menasheh wayiyṭav beʿeyneyhem׃

³¹ וַיֹּ֣אמֶר פִּֽינְחָ֣ס בֶּן־אֶלְעָזָ֣ר הַכֹּהֵ֡ן אֶל־בְּנֵי־רְאוּבֵ֨ן וְאֶל־בְּנֵי־גָ֜ד וְאֶל־בְּנֵ֣י מְנַשֶּׁ֗ה הַיֹּ֤ום ׀ יָדַ֙עְנוּ֙ כִּֽי־בְתֹוכֵ֣נוּ יְהוָ֔ה אֲשֶׁ֛ר לֹֽא־מְעַלְתֶּ֥ם בַּֽיהוָ֖ה הַמַּ֣עַל הַזֶּ֑ה אָ֗ז הִצַּלְתֶּ֛ם אֶת־בְּנֵ֥י יִשְׂרָאֵ֖ל מִיַּ֥ד יְהוָֽה׃ wayoʾmer piyneḥas ben־ʾeleʿazar hakohen ʾel־beney־reʾuven weʾel־beney־gad weʾel־beney menasheh hayowm ׀ yadaʿenu kiy־vetowkhenu yehwah ʾasher loʾ־meʿaletem bayhwah hamaʿal hazeh ʾaz hitsaletem ʾet־beney yiseraʾel miyad yehwah׃

³² וַיָּ֣שָׁב פִּֽינְחָ֣ס בֶּן־אֶלְעָזָ֣ר הַכֹּהֵ֣ן ׀ וְהַנְּשִׂיאִ֡ים מֵאֵ֣ת בְּנֵֽי־רְאוּבֵן֩ וּמֵאֵ֨ת בְּנֵי־גָ֜ד מֵאֶ֧רֶץ הַגִּלְעָ֛ד אֶל־אֶ֥רֶץ כְּנַ֖עַן אֶל־בְּנֵ֣י יִשְׂרָאֵ֑ל וַיָּשִׁ֥בוּ אֹותָ֖ם דָּבָֽר׃ wayashav piyneḥas ben־ʾeleʿazar hakohen ׀ wehanesiyʾiym meʾet beney־reʾuven umeʾet beney־gad meʾerets hagileʿad ʾel־ʾerets kenaʿan ʾel־beney yiseraʾel wayashivu ʾowtam davar׃

³³ וַיִּיטַ֣ב הַדָּבָ֗ר בְּעֵינֵי֙ בְּנֵ֣י יִשְׂרָאֵ֔ל וַיְבָרֲכ֥וּ אֱלֹהִ֖ים בְּנֵ֣י יִשְׂרָאֵ֑ל וְלֹ֣א אָמְר֗וּ לַעֲלֹ֤ות עֲלֵיהֶם֙ לַצָּבָ֔א לְשַׁחֵת֙ אֶת־הָאָ֔רֶץ אֲשֶׁ֛ר בְּנֵי־רְאוּבֵ֥ן וּבְנֵי־גָ֖ד יֹשְׁבִ֥ים בָּֽהּ׃ wayiyṭav hadavar beʿeyney beney yiseraʾel wayevarakhu ʾelohiym beney yiseraʾel weloʾ ʾameru laʿalowt ʿaleyhem latsavaʾ leshaḥet ʾet־haʾarets ʾasher beney־reʾuven uveney־gad yosheviym bah׃

³⁴ וַֽיִּקְרְא֛וּ בְּנֵי־רְאוּבֵ֥ן וּבְנֵי־גָ֖ד לַמִּזְבֵּ֑חַ כִּ֣י עֵ֥ד הוּא֙ בֵּֽינֹתֵ֔ינוּ כִּ֥י יְהוָ֖ה הָאֱלֹהִֽים׃ פ wayiqereʾu beney־reʾuven uveney־gad lamizebeaḥ kiy ʿed huʾ beynoteynu kiy yehwah haʾelohiym׃ f