2 Rois 18

¹ וַֽיְהִי֙ בִּשְׁנַ֣ת שָׁלֹ֔שׁ לְהֹושֵׁ֥עַ בֶּן־אֵלָ֖ה מֶ֣לֶךְ יִשְׂרָאֵ֑ל מָלַ֛ךְ חִזְקִיָּ֥ה בֶן־אָחָ֖ז מֶ֥לֶךְ יְהוּדָֽה׃ wayehiy bishenat shalosh lehowsheaʿ ben־ʾelah melekhe yiseraʾel malakhe ḥizeqiyah ven־ʾaḥaz melekhe yehudah׃

² בֶּן־עֶשְׂרִ֨ים וְחָמֵ֤שׁ שָׁנָה֙ הָיָ֣ה בְמָלְכֹ֔ו וְעֶשְׂרִ֤ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמֹּ֔ו אֲבִ֖י בַּת־זְכַרְיָֽה׃ ben־ʿeseriym weḥamesh shanah hayah vemalekhow weʿeseriym wateshaʿ shanah malakhe biyrushalim weshem ʾimow ʾaviy bat־zekhareyah׃

³ וַיַּ֥עַשׂ הַיָּשָׁ֖ר בְּעֵינֵ֣י יְהוָ֑ה כְּכֹ֥ל אֲשֶׁר־עָשָׂ֖ה דָּוִ֥ד אָבִֽיו׃ wayaʿas hayashar beʿeyney yehwah kekhol ʾasher־ʿasah dawid ʾaviyw׃

⁴ ה֣וּא ׀ הֵסִ֣יר אֶת־הַבָּמֹ֗ות וְשִׁבַּר֙ אֶת־הַמַּצֵּבֹ֔ת וְכָרַ֖ת אֶת־הָֽאֲשֵׁרָ֑ה וְכִתַּת֩ נְחַ֨שׁ הַנְּחֹ֜שֶׁת אֲשֶׁר־עָשָׂ֣ה מֹשֶׁ֗ה כִּ֣י עַד־הַיָּמִ֤ים הָהֵ֙מָּה֙ הָי֤וּ בְנֵֽי־יִשְׂרָאֵל֙ מְקַטְּרִ֣ים לֹ֔ו וַיִּקְרָא־לֹ֖ו נְחֻשְׁתָּֽן׃ huʾ ׀ hesiyr ʾet־habamowt weshibar ʾet־hamatsevot wekharat ʾet־haʾasherah wekhitat neḥash haneḥoshet ʾasher־ʿasah mosheh kiy ʿad־hayamiym hahemah hayu veney־yiseraʾel meqaṭeriym low wayiqeraʾ־low neḥushetan׃

⁵ בַּיהוָ֥ה אֱלֹהֵֽי־יִשְׂרָאֵ֖ל בָּטָ֑ח וְאַחֲרָ֞יו לֹא־הָיָ֣ה כָמֹ֗הוּ בְּכֹל֙ מַלְכֵ֣י יְהוּדָ֔ה וַאֲשֶׁ֥ר הָי֖וּ לְפָנָֽיו׃ bayhwah ʾelohey־yiseraʾel baṭaḥ weʾaḥarayw loʾ־hayah khamohu bekhol malekhey yehudah waʾasher hayu lefanayw׃

⁶ וַיִּדְבַּק֙ בַּֽיהוָ֔ה לֹא־סָ֖ר מֵאַֽחֲרָ֑יו וַיִּשְׁמֹר֙ מִצְוֹתָ֔יו אֲשֶׁר־צִוָּ֥ה יְהוָ֖ה אֶת־מֹשֶֽׁה׃ wayidebaq bayhwah loʾ־sar meʾaḥarayw wayishemor mitseotayw ʾasher־tsiuah yehwah ʾet־mosheh׃

⁷ וְהָיָ֤ה יְהוָה֙ עִמֹּ֔ו בְּכֹ֥ל אֲשֶׁר־יֵצֵ֖א יַשְׂכִּ֑יל וַיִּמְרֹ֥ד בְּמֶֽלֶךְ־אַשּׁ֖וּר וְלֹ֥א עֲבָדֹֽו׃ wehayah yehwah ʿimow bekhol ʾasher־yetseʾ yasekiyl wayimerod bemelekhe־ʾashur weloʾ ʿavadow׃

⁸ הֽוּא־הִכָּ֧ה אֶת־פְּלִשְׁתִּ֛ים עַד־עַזָּ֖ה וְאֶת־גְּבוּלֶ֑יהָ מִמִּגְדַּ֥ל נֹוצְרִ֖ים עַד־עִ֥יר מִבְצָֽר׃ פ huʾ־hikah ʾet־pelishetiym ʿad־ʿazah weʾet־gevuleyha mimigedal nowtseriym ʿad־ʿiyr mivetsar׃ f

⁹ וַֽיְהִ֞י בַּשָּׁנָ֤ה הָֽרְבִיעִית֙ לַמֶּ֣לֶךְ חִזְקִיָּ֔הוּ הִ֚יא הַשָּׁנָ֣ה הַשְּׁבִיעִ֔ית לְהֹושֵׁ֥עַ בֶּן־אֵלָ֖ה מֶ֣לֶךְ יִשְׂרָאֵ֑ל עָלָ֞ה שַׁלְמַנְאֶ֧סֶר מֶֽלֶךְ־אַשּׁ֛וּר עַל־שֹׁמְרֹ֖ון וַיָּ֥צַר עָלֶֽיהָ׃ wayehiy bashanah hareviyʿiyt lamelekhe ḥizeqiyahu hiyʾ hashanah hasheviyʿiyt lehowsheaʿ ben־ʾelah melekhe yiseraʾel ʿalah shalemaneʾeser melekhe־ʾashur ʿal־shomerown wayatsar ʿaleyha׃

¹⁰ וַֽיִּלְכְּדֻ֗הָ מִקְצֵה֙ שָׁלֹ֣שׁ שָׁנִ֔ים בִּשְׁנַת־שֵׁ֖שׁ לְחִזְקִיָּ֑ה הִ֣יא שְׁנַת־תֵּ֗שַׁע לְהֹושֵׁ֙עַ֙ מֶ֣לֶךְ יִשְׂרָאֵ֔ל נִלְכְּדָ֖ה שֹׁמְרֹֽון׃ wayilekeduah miqetseh shalosh shaniym bishenat־shesh leḥizeqiyah hiyʾ shenat־teshaʿ lehowsheaʿ melekhe yiseraʾel nilekedah shomerown׃

¹¹ וַיֶּ֧גֶל מֶֽלֶךְ־אַשּׁ֛וּר אֶת־יִשְׂרָאֵ֖ל אַשּׁ֑וּרָה וַיַּנְחֵ֞ם בַּחְלַ֧ח וּבְחָבֹ֛ור נְהַ֥ר גֹּוזָ֖ן וְעָרֵ֥י מָדָֽי׃ wayegel melekhe־ʾashur ʾet־yiseraʾel ʾashurah wayaneḥem baḥelaḥ uveḥavowr nehar gowzan weʿarey maday׃

¹² עַ֣ל ׀ אֲשֶׁ֣ר לֹֽא־שָׁמְע֗וּ בְּקֹול֙ יְהוָ֣ה אֱלֹהֵיהֶ֔ם וַיַּעַבְרוּ֙ אֶת־בְּרִיתֹ֔ו אֵ֚ת כָּל־אֲשֶׁ֣ר צִוָּ֔ה מֹשֶׁ֖ה עֶ֣בֶד יְהוָ֑ה וְלֹ֥א שָׁמְע֖וּ וְלֹ֥א עָשֽׂוּ׃ פ ʿal ׀ ʾasher loʾ־shameʿu beqowl yehwah ʾeloheyhem wayaʿaveru ʾet־beriytow ʾet kal־ʾasher tsiuah mosheh ʿeved yehwah weloʾ shameʿu weloʾ ʿasu׃ f

¹³ וּבְאַרְבַּע֩ עֶשְׂרֵ֨ה שָׁנָ֜ה לַמֶּ֣לֶךְ חִזְקִיָּ֗ה עָלָ֞ה סַנְחֵרִ֤יב מֶֽלֶךְ־אַשּׁוּר֙ עַ֣ל כָּל־עָרֵ֧י יְהוּדָ֛ה הַבְּצֻרֹ֖ות וַֽיִּתְפְּשֵֽׂם׃ uveʾarebaʿ ʿesereh shanah lamelekhe ḥizeqiyah ʿalah saneḥeriyv melekhe־ʾashur ʿal kal־ʿarey yehudah habetsurowt wayitepesem׃

¹⁴ וַיִּשְׁלַ֣ח חִזְקִיָּ֣ה מֶֽלֶךְ־יְהוּדָ֣ה אֶל־מֶֽלֶךְ־אַשּׁוּר֩ ׀ לָכִ֨ישָׁה ׀ לֵאמֹ֤ר ׀ חָטָ֙אתִי֙ שׁ֣וּב מֵֽעָלַ֔י אֵ֛ת אֲשֶׁר־תִּתֵּ֥ן עָלַ֖י אֶשָּׂ֑א וַיָּ֨שֶׂם מֶֽלֶךְ־אַשּׁ֜וּר עַל־חִזְקִיָּ֣ה מֶֽלֶךְ־יְהוּדָ֗ה שְׁלֹ֤שׁ מֵאֹות֙ כִּכַּר־כֶּ֔סֶף וּשְׁלֹשִׁ֖ים כִּכַּ֥ר זָהָֽב׃ wayishelaḥ ḥizeqiyah melekhe־yehudah ʾel־melekhe־ʾashur ׀ lakhiyshah ׀ leʾmor ׀ ḥaṭaʾtiy shuv meʿalay ʾet ʾasher־titen ʿalay ʾesaʾ wayasem melekhe־ʾashur ʿal־ḥizeqiyah melekhe־yehudah shelosh meʾowt kikar־kesef usheloshiym kikar zahav׃

¹⁵ וַיִּתֵּן֙ חִזְקִיָּ֔ה אֶת־כָּל־הַכֶּ֖סֶף הַנִּמְצָ֣א בֵית־יְהוָ֑ה וּבְאֹצְרֹ֖ות בֵּ֥ית הַמֶּֽלֶךְ׃ wayiten ḥizeqiyah ʾet־kal־hakesef hanimetsaʾ veyt־yehwah uveʾotserowt beyt hamelekhe׃

¹⁶ בָּעֵ֣ת הַהִ֗יא קִצַּ֨ץ חִזְקִיָּ֜ה אֶת־דַּלְתֹ֨ות הֵיכַ֤ל יְהוָה֙ וְאֶת־הָאֹ֣מְנֹ֔ות אֲשֶׁ֣ר צִפָּ֔ה חִזְקִיָּ֖ה מֶ֣לֶךְ יְהוּדָ֑ה וַֽיִּתְּנֵ֖ם לְמֶ֥לֶךְ אַשּֽׁוּר׃ פ baʿet hahiyʾ qitsats ḥizeqiyah ʾet־daletowt heykhal yehwah weʾet־haʾomenowt ʾasher tsipah ḥizeqiyah melekhe yehudah wayitenem lemelekhe ʾashur׃ f

¹⁷ וַיִּשְׁלַ֣ח מֶֽלֶךְ־אַשּׁ֡וּר אֶת־תַּרְתָּ֥ן וְאֶת־רַב־סָרִ֣יס ׀ וְאֶת־רַב־שָׁקֵ֨ה מִן־לָכִ֜ישׁ אֶל־הַמֶּ֧לֶךְ חִזְקִיָּ֛הוּ בְּחֵ֥יל כָּבֵ֖ד יְרוּשָׁלִָ֑ם וַֽיַּעֲלוּ֙ וַיָּבֹ֣אוּ יְרוּשָׁלִַ֔ם וַיַּעֲל֣וּ וַיָּבֹ֗אוּ וַיַּֽעַמְדוּ֙ בִּתְעָלַת֙ הַבְּרֵכָ֣ה הָֽעֶלְיֹונָ֔ה אֲשֶׁ֕ר בִּמְסִלַּ֖ת שְׂדֵ֥ה כֹובֵֽס׃ wayishelaḥ melekhe־ʾashur ʾet־taretan weʾet־rav־sariys ׀ weʾet־rav־shaqeh min־lakhiysh ʾel־hamelekhe ḥizeqiyahu beḥeyl kaved yerushalim wayaʿalu wayavoʾu yerushalim wayaʿalu wayavoʾu wayaʿamedu biteʿalat haberekhah haʿeleyownah ʾasher bimesilat sedeh khowves׃

¹⁸ וַֽיִּקְרְאוּ֙ אֶל־הַמֶּ֔לֶךְ וַיֵּצֵ֧א אֲלֵהֶ֛ם אֶלְיָקִ֥ים בֶּן־חִלְקִיָּ֖הוּ אֲשֶׁ֣ר עַל־הַבָּ֑יִת וְשֶׁבְנָה֙ הַסֹּפֵ֔ר וְיֹואָ֥ח בֶּן־אָסָ֖ף הַמַּזְכִּֽיר׃ wayiqereʾu ʾel־hamelekhe wayetseʾ ʾalehem ʾeleyaqiym ben־ḥileqiyahu ʾasher ʿal־habayit weshevenah hasofer weyowʾaḥ ben־ʾasaf hamazekiyr׃

¹⁹ וַיֹּ֤אמֶר אֲלֵהֶם֙ רַב־שָׁקֵ֔ה אִמְרוּ־נָ֖א אֶל־חִזְקִיָּ֑הוּ כֹּֽה־אָמַ֞ר הַמֶּ֤לֶךְ הַגָּדֹול֙ מֶ֣לֶךְ אַשּׁ֔וּר מָ֧ה הַבִּטָּחֹ֛ון הַזֶּ֖ה אֲשֶׁ֥ר בָּטָֽחְתָּ׃ wayoʾmer ʾalehem rav־shaqeh ʾimeru־naʾ ʾel־ḥizeqiyahu koh־ʾamar hamelekhe hagadowl melekhe ʾashur mah habiṭaḥown hazeh ʾasher baṭaḥeta׃

²⁰ אָמַ֙רְתָּ֙ אַךְ־דְּבַר־שְׂפָתַ֔יִם עֵצָ֥ה וּגְבוּרָ֖ה לַמִּלְחָמָ֑ה עַתָּה֙ עַל־מִ֣י בָטַ֔חְתָּ כִּ֥י מָרַ֖דְתָּ בִּֽי׃ ʾamareta ʾakhe־devar־sefatayim ʿetsah ugevurah lamileḥamah ʿatah ʿal־miy vaṭaḥeta kiy maradeta biy׃

²¹ עַתָּ֡ה הִנֵּ֣ה בָטַ֣חְתָּ לְּךָ֡ עַל־מִשְׁעֶנֶת֩ הַקָּנֶ֨ה הָרָצ֤וּץ הַזֶּה֙ עַל־מִצְרַ֔יִם אֲשֶׁ֨ר יִסָּמֵ֥ךְ אִישׁ֙ עָלָ֔יו וּבָ֥א בְכַפֹּ֖ו וּנְקָבָ֑הּ כֵּ֚ן פַּרְעֹ֣ה מֶֽלֶךְ־מִצְרַ֔יִם לְכָֽל־הַבֹּטְחִ֖ים עָלָֽיו׃ ʿatah hineh vaṭaḥeta lekha ʿal־misheʿenet haqaneh haratsuts hazeh ʿal־mitserayim ʾasher yisamekhe ʾiysh ʿalayw uvaʾ vekhapow uneqavah ken pareʿoh melekhe־mitserayim lekhal־haboṭeḥiym ʿalayw׃

²² וְכִי־תֹאמְר֣וּן אֵלַ֔י אֶל־יְהוָ֥ה אֱלֹהֵ֖ינוּ בָּטָ֑חְנוּ הֲלֹוא־ה֗וּא אֲשֶׁ֨ר הֵסִ֤יר חִזְקִיָּ֙הוּ֙ אֶת־בָּמֹתָ֣יו וְאֶת־מִזְבְּחֹתָ֔יו וַיֹּ֤אמֶר לִֽיהוּדָה֙ וְלִיר֣וּשָׁלִַ֔ם לִפְנֵי֙ הַמִּזְבֵּ֣חַ הַזֶּ֔ה תִּֽשְׁתַּחֲו֖וּ בִּירוּשָׁלִָֽם׃ wekhiy־toʾmerun ʾelay ʾel־yehwah ʾeloheynu baṭaḥenu halowʾ־huʾ ʾasher hesiyr ḥizeqiyahu ʾet־bamotayw weʾet־mizebeḥotayw wayoʾmer liyhudah weliyrushalim lifeney hamizebeaḥ hazeh tishetaḥawu biyrushalim׃

²³ וְעַתָּה֙ הִתְעָ֣רֶב נָ֔א אֶת־אֲדֹנִ֖י אֶת־מֶ֣לֶךְ אַשּׁ֑וּר וְאֶתְּנָ֤ה לְךָ֙ אַלְפַּ֣יִם סוּסִ֔ים אִם־תּוּכַ֕ל לָ֥תֶת לְךָ֖ רֹכְבִ֥ים עֲלֵיהֶֽם׃ weʿatah hiteʿarev naʾ ʾet־ʾadoniy ʾet־melekhe ʾashur weʾetenah lekha ʾalepayim susiym ʾim־tukhal latet lekha rokheviym ʿaleyhem׃

²⁴ וְאֵ֣יךְ תָּשִׁ֗יב אֵ֠ת פְּנֵ֨י פַחַ֥ת אַחַ֛ד עַבְדֵ֥י אֲדֹנִ֖י הַקְּטַנִּ֑ים וַתִּבְטַ֤ח לְךָ֙ עַל־מִצְרַ֔יִם לְרֶ֖כֶב וּלְפָרָשִֽׁים׃ weʾeykhe tashiyv ʾet peney faḥat ʾaḥad ʿavedey ʾadoniy haqeṭaniym wativeṭaḥ lekha ʿal־mitserayim lerekhev ulefarashiym׃

²⁵ עַתָּה֙ הֲמִבַּלְעֲדֵ֣י יְהוָ֔ה עָלִ֛יתִי עַל־הַמָּקֹ֥ום הַזֶּ֖ה לְהַשְׁחִתֹ֑ו יְהוָה֙ אָמַ֣ר אֵלַ֔י עֲלֵ֛ה עַל־הָאָ֥רֶץ הַזֹּ֖את וְהַשְׁחִיתָֽהּ׃ ʿatah hamibaleʿadey yehwah ʿaliytiy ʿal־hamaqowm hazeh lehasheḥitow yehwah ʾamar ʾelay ʿaleh ʿal־haʾarets hazoʾt wehasheḥiytah׃

²⁶ וַיֹּ֣אמֶר אֶלְיָקִ֣ים בֶּן־חִ֠לְקִיָּהוּ וְשֶׁבְנָ֨ה וְיֹואָ֜ח אֶל־רַב־שָׁקֵ֗ה דַּבֶּר־נָ֤א אֶל־עֲבָדֶ֙יךָ֙ אֲרָמִ֔ית כִּ֥י שֹׁמְעִ֖ים אֲנָ֑חְנוּ וְאַל־תְּדַבֵּ֤ר עִמָּ֙נוּ֙ יְהוּדִ֔ית בְּאָזְנֵ֣י הָעָ֔ם אֲשֶׁ֖ר עַל־הַחֹמָֽה׃ wayoʾmer ʾeleyaqiym ben־ḥileqiyahu weshevenah weyowʾaḥ ʾel־rav־shaqeh daber־naʾ ʾel־ʿavadeykha ʾaramiyt kiy shomeʿiym ʾanaḥenu weʾal־tedaber ʿimanu yehudiyt beʾazeney haʿam ʾasher ʿal־haḥomah׃

²⁷ וַיֹּ֨אמֶר אֲלֵיהֶ֜ם רַב־שָׁקֵ֗ה הַעַ֨ל אֲדֹנֶ֤יךָ וְאֵלֶ֙יךָ֙ שְׁלָחַ֣נִי אֲדֹנִ֔י לְדַבֵּ֖ר אֶת־הַדְּבָרִ֣ים הָאֵ֑לֶּה הֲלֹ֣א עַל־הָאֲנָשִׁ֗ים הַיֹּֽשְׁבִים֙ עַל־הַ֣חֹמָ֔ה לֶאֱכֹ֣ל אֶת [חֲרֵיהֶם כ] (צֹואָתָ֗ם ק) וְלִשְׁתֹּ֛ות אֶת־ [שֵׁינֵיהֶם כ] (מֵֽימֵי ק) (רַגְלֵיהֶ֖ם ק) עִמָּכֶֽם׃ wayoʾmer ʾaleyhem rav־shaqeh haʿal ʾadoneykha weʾeleykha shelaḥaniy ʾadoniy ledaber ʾet־hadevariym haʾeleh haloʾ ʿal־haʾanashiym hayosheviym ʿal־haḥomah leʾekhol ʾet [ḥareyhem kh] (tsowʾatam q) welishetowt ʾet־ [sheyneyhem kh] (meymey q) (rageleyhem q) ʿimakhem׃

²⁸ וַֽיַּעֲמֹד֙ רַב־שָׁקֵ֔ה וַיִּקְרָ֥א בְקֹול־גָּדֹ֖ול יְהוּדִ֑ית וַיְדַבֵּ֣ר וַיֹּ֔אמֶר שִׁמְע֛וּ דְּבַר־הַמֶּ֥לֶךְ הַגָּדֹ֖ול מֶ֥לֶךְ אַשּֽׁוּר׃ wayaʿamod rav־shaqeh wayiqeraʾ veqowl־gadowl yehudiyt wayedaber wayoʾmer shimeʿu devar־hamelekhe hagadowl melekhe ʾashur׃

²⁹ כֹּ֚ה אָמַ֣ר הַמֶּ֔לֶךְ אַל־יַשִּׁ֥יא לָכֶ֖ם חִזְקִיָּ֑הוּ כִּי־לֹ֣א יוּכַ֔ל לְהַצִּ֥יל אֶתְכֶ֖ם מִיָּדֹֽו׃ koh ʾamar hamelekhe ʾal־yashiyʾ lakhem ḥizeqiyahu kiy־loʾ yukhal lehatsiyl ʾetekhem miyadow׃

³⁰ וְאַל־יַבְטַ֨ח אֶתְכֶ֤ם חִזְקִיָּ֙הוּ֙ אֶל־יְהוָ֣ה לֵאמֹ֔ר הַצֵּ֥ל יַצִּילֵ֖נוּ יְהוָ֑ה וְלֹ֤א תִנָּתֵן֙ אֶת־הָעִ֣יר הַזֹּ֔את בְּיַ֖ד מֶ֥לֶךְ אַשּֽׁוּר׃ weʾal־yaveṭaḥ ʾetekhem ḥizeqiyahu ʾel־yehwah leʾmor hatsel yatsiylenu yehwah weloʾ tinaten ʾet־haʿiyr hazoʾt beyad melekhe ʾashur׃

³¹ אַֽל־תִּשְׁמְע֖וּ אֶל־חִזְקִיָּ֑הוּ כִּי֩ כֹ֨ה אָמַ֜ר מֶ֣לֶךְ אַשּׁ֗וּר עֲשֽׂוּ־אִתִּ֤י בְרָכָה֙ וּצְא֣וּ אֵלַ֔י וְאִכְל֤וּ אִישׁ־גַּפְנֹו֙ וְאִ֣ישׁ תְּאֵֽנָתֹ֔ו וּשְׁת֖וּ אִ֥ישׁ מֵֽי־בֹורֹֽו׃ ʾal־tishemeʿu ʾel־ḥizeqiyahu kiy khoh ʾamar melekhe ʾashur ʿasu־ʾitiy verakhah utseʾu ʾelay weʾikhelu ʾiysh־gafenow weʾiysh teʾenatow ushetu ʾiysh mey־vowrow׃

³² עַד־בֹּאִי֩ וְלָקַחְתִּ֨י אֶתְכֶ֜ם אֶל־אֶ֣רֶץ כְּאַרְצְכֶ֗ם אֶרֶץ֩ דָּגָ֨ן וְתִירֹ֜ושׁ אֶ֧רֶץ לֶ֣חֶם וּכְרָמִ֗ים אֶ֣רֶץ זֵ֤ית יִצְהָר֙ וּדְבַ֔שׁ וִֽחְי֖וּ וְלֹ֣א תָמֻ֑תוּ וְאַֽל־תִּשְׁמְעוּ֙ אֶל־חִזְקִיָּ֔הוּ כִּֽי־יַסִּ֤ית אֶתְכֶם֙ לֵאמֹ֔ר יְהוָ֖ה יַצִּילֵֽנוּ׃ ʿad־boʾiy welaqaḥetiy ʾetekhem ʾel־ʾerets keʾaretsekhem ʾerets dagan wetiyrowsh ʾerets leḥem ukheramiym ʾerets zeyt yitsehar udevash wiḥeyu weloʾ tamutu weʾal־tishemeʿu ʾel־ḥizeqiyahu kiy־yasiyt ʾetekhem leʾmor yehwah yatsiylenu׃

³³ הַהַצֵּ֥ל הִצִּ֛ילוּ אֱלֹהֵ֥י הַגֹּויִ֖ם אִ֣ישׁ אֶת־אַרְצֹ֑ו מִיַּ֖ד מֶ֥לֶךְ אַשּֽׁוּר׃ hahatsel hitsiylu ʾelohey hagowyim ʾiysh ʾet־ʾaretsow miyad melekhe ʾashur׃

³⁴ אַיֵּה֩ אֱלֹהֵ֨י חֲמָ֜ת וְאַרְפָּ֗ד אַיֵּ֛ה אֱלֹהֵ֥י סְפַרְוַ֖יִם הֵנַ֣ע וְעִוָּ֑ה כִּֽי־הִצִּ֥ילוּ אֶת־שֹׁמְרֹ֖ון מִיָּדִֽי׃ ʾayeh ʾelohey ḥamat weʾarepad ʾayeh ʾelohey sefarewayim henaʿ weʿiuah kiy־hitsiylu ʾet־shomerown miyadiy׃

³⁵ מִ֚י בְּכָל־אֱלֹהֵ֣י הָֽאֲרָצֹ֔ות אֲשֶׁר־הִצִּ֥ילוּ אֶת־אַרְצָ֖ם מִיָּדִ֑י כִּי־יַצִּ֧יל יְהוָ֛ה אֶת־יְרוּשָׁלִַ֖ם מִיָּדִֽי׃ miy bekhal־ʾelohey haʾaratsowt ʾasher־hitsiylu ʾet־ʾaretsam miyadiy kiy־yatsiyl yehwah ʾet־yerushalim miyadiy׃

³⁶ וְהֶחֱרִ֣ישׁוּ הָעָ֔ם וְלֹֽא־עָנ֥וּ אֹתֹ֖ו דָּבָ֑ר כִּי־מִצְוַ֨ת הַמֶּ֥לֶךְ הִ֛יא לֵאמֹ֖ר לֹ֥א תַעֲנֻֽהוּ׃ weheḥeriyshu haʿam weloʾ־ʿanu ʾotow davar kiy־mitsewat hamelekhe hiyʾ leʾmor loʾ taʿanuhu׃

³⁷ וַיָּבֹ֣א אֶלְיָקִ֣ים בֶּן־חִלְקִיָּ֣ה אֲשֶׁר־עַל־הַ֠בַּיִת וְשֶׁבְנָ֨א הַסֹּפֵ֜ר וְיֹואָ֨ח בֶּן־אָסָ֧ף הַמַּזְכִּ֛יר אֶל־חִזְקִיָּ֖הוּ קְרוּעֵ֣י בְגָדִ֑ים וַיַּגִּ֣דוּ לֹ֔ו דִּבְרֵ֖י רַב־שָׁקֵֽה׃ wayavoʾ ʾeleyaqiym ben־ḥileqiyah ʾasher־ʿal־habayit weshevenaʾ hasofer weyowʾaḥ ben־ʾasaf hamazekiyr ʾel־ḥizeqiyahu qeruʿey vegadiym wayagidu low diverey rav־shaqeh׃