2 Samuel 1

¹ וַיְהִ֗י אַֽחֲרֵי֙ מֹ֣ות שָׁא֔וּל וְדָוִ֣ד שָׁ֔ב מֵהַכֹּ֖ות אֶת־הָעֲמָלֵ֑ק וַיֵּ֧שֶׁב דָּוִ֛ד בְּצִקְלָ֖ג יָמִ֥ים שְׁנָֽיִם׃ wayehiy ʾaḥarey mowt shaʾul wedawid shav mehakowt ʾet־haʿamaleq wayeshev dawid betsiqelag yamiym shenayim׃

² וַיְהִ֣י ׀ בַּיֹּ֣ום הַשְּׁלִישִׁ֗י וְהִנֵּה֩ אִ֨ישׁ בָּ֤א מִן־הַֽמַּחֲנֶה֙ מֵעִ֣ם שָׁא֔וּל וּבְגָדָ֣יו קְרֻעִ֔ים וַאֲדָמָ֖ה עַל־רֹאשֹׁ֑ו וַיְהִי֙ בְּבֹאֹ֣ו אֶל־דָּוִ֔ד וַיִּפֹּ֥ל אַ֖רְצָה וַיִּשְׁתָּֽחוּ׃ wayehiy ׀ bayowm hasheliyshiy wehineh ʾiysh baʾ min־hamaḥaneh meʿim shaʾul uvegadayw qeruʿiym waʾadamah ʿal־roʾshow wayehiy bevoʾow ʾel־dawid wayipol ʾaretsah wayishetaḥu׃

³ וַיֹּ֤אמֶר לֹו֙ דָּוִ֔ד אֵ֥י מִזֶּ֖ה תָּבֹ֑וא וַיֹּ֣אמֶר אֵלָ֔יו מִמַּחֲנֵ֥ה יִשְׂרָאֵ֖ל נִמְלָֽטְתִּי׃ wayoʾmer low dawid ʾey mizeh tavowʾ wayoʾmer ʾelayw mimaḥaneh yiseraʾel nimelaṭetiy׃

⁴ וַיֹּ֨אמֶר אֵלָ֥יו דָּוִ֛ד מֶה־הָיָ֥ה הַדָּבָ֖ר הַגֶּד־נָ֣א לִ֑י וַ֠יֹּאמֶר אֲשֶׁר־נָ֨ס הָעָ֜ם מִן־הַמִּלְחָמָ֗ה וְגַם־הַרְבֵּ֞ה נָפַ֤ל מִן־הָעָם֙ וַיָּמֻ֔תוּ וְגַ֗ם שָׁא֛וּל וִיהֹונָתָ֥ן בְּנֹ֖ו מֵֽתוּ׃ wayoʾmer ʾelayw dawid meh־hayah hadavar haged־naʾ liy wayoʾmer ʾasher־nas haʿam min־hamileḥamah wegam־harebeh nafal min־haʿam wayamutu wegam shaʾul wiyhownatan benow metu׃

⁵ וַיֹּ֣אמֶר דָּוִ֔ד אֶל־הַנַּ֖עַר הַמַּגִּ֣יד לֹ֑ו אֵ֣יךְ יָדַ֔עְתָּ כִּי־מֵ֥ת שָׁא֖וּל וִיהֹֽונָתָ֥ן בְּנֹֽו׃ wayoʾmer dawid ʾel־hanaʿar hamagiyd low ʾeykhe yadaʿeta kiy־met shaʾul wiyhownatan benow׃

⁶ וַיֹּ֜אמֶר הַנַּ֣עַר ׀ הַמַּגִּ֣יד לֹ֗ו נִקְרֹ֤א נִקְרֵ֙יתִי֙ בְּהַ֣ר הַגִּלְבֹּ֔עַ וְהִנֵּ֥ה שָׁא֖וּל נִשְׁעָ֣ן עַל־חֲנִיתֹ֑ו וְהִנֵּ֥ה הָרֶ֛כֶב וּבַעֲלֵ֥י הַפָּרָשִׁ֖ים הִדְבִּקֻֽהוּ׃ wayoʾmer hanaʿar ׀ hamagiyd low niqeroʾ niqereytiy behar hagileboaʿ wehineh shaʾul nisheʿan ʿal־ḥaniytow wehineh harekhev uvaʿaley haparashiym hidebiquhu׃

⁷ וַיִּ֥פֶן אַחֲרָ֖יו וַיִּרְאֵ֑נִי וַיִּקְרָ֣א אֵלָ֔י וָאֹמַ֖ר הִנֵּֽנִי׃ wayifen ʾaḥarayw wayireʾeniy wayiqeraʾ ʾelay waʾomar hineniy׃

⁸ וַיֹּ֥אמֶר לִ֖י מִי־אָ֑תָּה [וַיֹּאמֶר כ] (וָאֹמַ֣ר ק) אֵלָ֔יו עֲמָלֵקִ֖י אָנֹֽכִי׃ wayoʾmer liy miy־ʾatah [wayoʾmer kh] (waʾomar q) ʾelayw ʿamaleqiy ʾanokhiy׃

⁹ וַיֹּ֣אמֶר אֵלַ֗י עֲמָד־נָ֤א עָלַי֙ וּמֹ֣תְתֵ֔נִי כִּ֥י אֲחָזַ֖נִי הַשָּׁבָ֑ץ כִּֽי־כָל־עֹ֥וד נַפְשִׁ֖י בִּֽי׃ wayoʾmer ʾelay ʿamad־naʾ ʿalay umoteteniy kiy ʾaḥazaniy hashavats kiy־khal־ʿowd nafeshiy biy׃

¹⁰ וָאֶעֱמֹ֤ד עָלָיו֙ וַאֲמֹ֣תְתֵ֔הוּ כִּ֣י יָדַ֔עְתִּי כִּ֛י לֹ֥א יִֽחְיֶ֖ה אַחֲרֵ֣י נִפְלֹ֑ו וָאֶקַּ֞ח הַנֵּ֣זֶר ׀ אֲשֶׁ֣ר עַל־רֹאשֹׁ֗ו וְאֶצְעָדָה֙ אֲשֶׁ֣ר עַל־זְרֹעֹ֔ו וָאֲבִיאֵ֥ם אֶל־אֲדֹנִ֖י הֵֽנָּה׃ waʾeʿemod ʿalayw waʾamotetehu kiy yadaʿetiy kiy loʾ yiḥeyeh ʾaḥarey nifelow waʾeqaḥ hanezer ׀ ʾasher ʿal־roʾshow weʾetseʿadah ʾasher ʿal־zeroʿow waʾaviyʾem ʾel־ʾadoniy henah׃

¹¹ וַיַּחֲזֵ֥ק דָּוִ֛ד [בִּבְגָדֹו כ] (בִּבְגָדָ֖יו ק) וַיִּקְרָעֵ֑ם וְגַ֥ם כָּל־הָאֲנָשִׁ֖ים אֲשֶׁ֥ר אִתֹּֽו׃ wayaḥazeq dawid [bivegadow kh] (bivegadayw q) wayiqeraʿem wegam kal־haʾanashiym ʾasher ʾitow׃

¹² וַֽיִּסְפְּדוּ֙ וַיִּבְכּ֔וּ וַיָּצֻ֖מוּ עַד־הָעָ֑רֶב עַל־שָׁא֞וּל וְעַל־יְהֹונָתָ֣ן בְּנֹ֗ו וְעַל־עַ֤ם יְהוָה֙ וְעַל־בֵּ֣ית יִשְׂרָאֵ֔ל כִּ֥י נָפְל֖וּ בֶּחָֽרֶב׃ ס wayisepedu wayiveku wayatsumu ʿad־haʿarev ʿal־shaʾul weʿal־yehownatan benow weʿal־ʿam yehwah weʿal־beyt yiseraʾel kiy nafelu beḥarev׃ s

¹³ וַיֹּ֣אמֶר דָּוִ֗ד אֶל־הַנַּ֙עַר֙ הַמַּגִּ֣יד לֹ֔ו אֵ֥י מִזֶּ֖ה אָ֑תָּה וַיֹּ֕אמֶר בֶּן־אִ֛ישׁ גֵּ֥ר עֲמָלֵקִ֖י אָנֹֽכִי׃ wayoʾmer dawid ʾel־hanaʿar hamagiyd low ʾey mizeh ʾatah wayoʾmer ben־ʾiysh ger ʿamaleqiy ʾanokhiy׃

¹⁴ וַיֹּ֥אמֶר אֵלָ֖יו דָּוִ֑ד אֵ֚יךְ לֹ֣א יָרֵ֔אתָ לִשְׁלֹ֙חַ֙ יָֽדְךָ֔ לְשַׁחֵ֖ת אֶת־מְשִׁ֥יחַ יְהוָֽה׃ wayoʾmer ʾelayw dawid ʾeykhe loʾ yareʾta lisheloaḥ yadekha leshaḥet ʾet־meshiyḥa yehwah׃

¹⁵ וַיִּקְרָ֣א דָוִ֗ד לְאַחַד֙ מֵֽהַנְּעָרִ֔ים וַיֹּ֖אמֶר גַּ֣שׁ פְּגַע־בֹּ֑ו וַיַּכֵּ֖הוּ וַיָּמֹֽת׃ wayiqeraʾ dawid leʾaḥad mehaneʿariym wayoʾmer gash pegaʿ־bow wayakehu wayamot׃

¹⁶ וַיֹּ֤אמֶר אֵלָיו֙ דָּוִ֔ד [דָּמֵיךָ כ] (דָּמְךָ֖ ק) עַל־רֹאשֶׁ֑ךָ כִּ֣י פִ֗יךָ עָנָ֤ה בְךָ֙ לֵאמֹ֔ר אָנֹכִ֥י מֹתַ֖תִּי אֶת־מְשִׁ֥יחַ יְהוָֽה׃ ס wayoʾmer ʾelayw dawid [dameykha kh] (damekha q) ʿal־roʾshekha kiy fiykha ʿanah vekha leʾmor ʾanokhiy motatiy ʾet־meshiyḥa yehwah׃ s

¹⁷ וַיְקֹנֵ֣ן דָּוִ֔ד אֶת־הַקִּינָ֖ה הַזֹּ֑את עַל־שָׁא֖וּל וְעַל־יְהֹונָתָ֥ן בְּנֹֽו׃ wayeqonen dawid ʾet־haqiynah hazoʾt ʿal־shaʾul weʿal־yehownatan benow׃

¹⁸ וַיֹּ֕אמֶר לְלַמֵּ֥ד בְּנֵֽי־יְהוּדָ֖ה קָ֑שֶׁת הִנֵּ֥ה כְתוּבָ֖ה עַל־סֵ֥פֶר הַיָּשָֽׁר׃ wayoʾmer lelamed beney־yehudah qashet hineh khetuvah ʿal־sefer hayashar׃

¹⁹ הַצְּבִי֙ יִשְׂרָאֵ֔ל עַל־בָּמֹותֶ֖יךָ חָלָ֑ל אֵ֖יךְ נָפְל֥וּ גִבֹּורִֽים׃ hatseviy yiseraʾel ʿal־bamowteykha ḥalal ʾeykhe nafelu gibowriym׃

²⁰ אַל־תַּגִּ֣ידוּ בְגַ֔ת אַֽל־תְּבַשְּׂר֖וּ בְּחוּצֹ֣ת אַשְׁקְלֹ֑ון פֶּן־תִּשְׂמַ֙חְנָה֙ בְּנֹ֣ות פְּלִשְׁתִּ֔ים פֶּֽן־תַּעֲלֹ֖זְנָה בְּנֹ֥ות הָעֲרֵלִֽים׃ ʾal־tagiydu vegat ʾal־tevaseru beḥutsot ʾasheqelown pen־tisemaḥenah benowt pelishetiym pen־taʿalozenah benowt haʿareliym׃

²¹ הָרֵ֣י בַגִּלְבֹּ֗עַ אַל־טַ֧ל וְאַל־מָטָ֛ר עֲלֵיכֶ֖ם וּשְׂדֵ֣י תְרוּמֹ֑ת כִּ֣י שָׁ֤ם נִגְעַל֙ מָגֵ֣ן גִּבֹּורִ֔ים מָגֵ֣ן שָׁא֔וּל בְּלִ֖י מָשִׁ֥יחַ בַּשָּֽׁמֶן׃ harey vagileboaʿ ʾal־ṭal weʾal־maṭar ʿaleykhem usedey terumot kiy sham nigeʿal magen gibowriym magen shaʾul beliy mashiyḥa bashamen׃

²² מִדַּ֣ם חֲלָלִ֗ים מֵחֵ֙לֶב֙ גִּבֹּורִ֔ים קֶ֚שֶׁת יְהֹ֣ונָתָ֔ן לֹ֥א נָשֹׂ֖וג אָחֹ֑ור וְחֶ֣רֶב שָׁא֔וּל לֹ֥א תָשׁ֖וּב רֵיקָֽם׃ midam ḥalaliym meḥelev gibowriym qeshet yehownatan loʾ nasowg ʾaḥowr weḥerev shaʾul loʾ tashuv reyqam׃

²³ שָׁא֣וּל וִיהֹונָתָ֗ן הַנֶּאֱהָבִ֤ים וְהַנְּעִימִם֙ בְּחַיֵּיהֶ֔ם וּבְמֹותָ֖ם לֹ֣א נִפְרָ֑דוּ מִנְּשָׁרִ֣ים קַ֔לּוּ מֵאֲרָיֹ֖ות גָּבֵֽרוּ׃ shaʾul wiyhownatan haneʾehaviym wehaneʿiymim beḥayeyhem uvemowtam loʾ niferadu mineshariym qalu meʾarayowt gaveru׃

²⁴ בְּנֹות֙ יִשְׂרָאֵ֔ל אֶל־שָׁא֖וּל בְּכֶ֑ינָה הַמַּלְבִּֽשְׁכֶ֤ם שָׁנִי֙ עִם־עֲדָנִ֔ים הַֽמַּעֲלֶה֙ עֲדִ֣י זָהָ֔ב עַ֖ל לְבוּשְׁכֶֽן׃ benowt yiseraʾel ʾel־shaʾul bekheynah hamalebishekhem shaniy ʿim־ʿadaniym hamaʿaleh ʿadiy zahav ʿal levushekhen׃

²⁵ אֵ֚יךְ נָפְל֣וּ גִבֹּרִ֔ים בְּתֹ֖וךְ הַמִּלְחָמָ֑ה יְהֹ֣ונָתָ֔ן עַל־בָּמֹותֶ֖יךָ חָלָֽל׃ ʾeykhe nafelu giboriym betowkhe hamileḥamah yehownatan ʿal־bamowteykha ḥalal׃

²⁶ צַר־לִ֣י עָלֶ֗יךָ אָחִי֙ יְהֹ֣ונָתָ֔ן נָעַ֥מְתָּ לִּ֖י מְאֹ֑ד נִפְלְאַ֤תָה אַהֲבָֽתְךָ֙ לִ֔י מֵאַהֲבַ֖ת נָשִֽׁים׃ tsar־liy ʿaleykha ʾaḥiy yehownatan naʿameta liy meʾod nifeleʾatah ʾahavatekha liy meʾahavat nashiym׃

²⁷ אֵ֚יךְ נָפְל֣וּ גִבֹּורִ֔ים וַיֹּאבְד֖וּ כְּלֵ֥י מִלְחָמָֽה׃ פ ʾeykhe nafelu gibowriym wayoʾvedu keley mileḥamah׃ f