1 וַיְהִ֥י דְבַר־יְהוָ֖ה אֵלַ֥י לֵאמֹֽר׃ wayehiy devar־yehwah ʾelay leʾmor׃
2 וְאַתָּ֣ה בֶן־אָדָ֗ם כֹּה־אָמַ֞ר אֲדֹנָ֧י יְהוִ֛ה לְאַדְמַ֥ת יִשְׂרָאֵ֖ל קֵ֑ץ בָּ֣א הַקֵּ֔ץ עַל־ [אַרְבַּעַת כ] (אַרְבַּ֖ע ק) כַּנְפֹ֥ות הָאָֽרֶץ׃ weʾatah ven־ʾadam koh־ʾamar ʾadonay yehwih leʾademat yiseraʾel qets baʾ haqets ʿal־ [ʾarebaʿat kh] (ʾarebaʿ q) kanefowt haʾarets׃
3 עַתָּה֙ הַקֵּ֣ץ עָלַ֔יִךְ וְשִׁלַּחְתִּ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כָּל־תֹּועֲבֹתָֽיִךְ׃ ʿatah haqets ʿalayikhe weshilaḥetiy ʾapiy bakhe ushefaṭetiykhe kiderakhayikhe wenatatiy ʿalayikhe ʾet kal־towʿavotayikhe׃
4 וְלֹא־תָחֹ֥וס עֵינִ֛י עָלַ֖יִךְ וְלֹ֣א אֶחְמֹ֑ול כִּ֣י דְרָכַ֜יִךְ עָלַ֣יִךְ אֶתֵּ֗ן וְתֹועֲבֹותַ֙יִךְ֙ בְּתֹוכֵ֣ךְ תִּֽהְיֶ֔יןָ וִידַעְתֶּ֖ם כִּֽי־אֲנִ֥י יְהוָֽה׃ פ weloʾ־taḥows ʿeyniy ʿalayikhe weloʾ ʾeḥemowl kiy derakhayikhe ʿalayikhe ʾeten wetowʿavowtayikhe betowkhekhe tiheyeyna wiydaʿetem kiy־ʾaniy yehwah׃ f
5 כֹּ֥ה אָמַ֖ר אֲדֹנָ֣י יְהוִ֑ה רָעָ֛ה אַחַ֥ת רָעָ֖ה הִנֵּ֥ה בָאָֽה׃ koh ʾamar ʾadonay yehwih raʿah ʾaḥat raʿah hineh vaʾah׃
6 קֵ֣ץ בָּ֔א בָּ֥א הַקֵּ֖ץ הֵקִ֣יץ אֵלָ֑יִךְ הִנֵּ֖ה בָּאָֽה׃ qets baʾ baʾ haqets heqiyts ʾelayikhe hineh baʾah׃
7 בָּ֧אָה הַצְּפִירָ֛ה אֵלֶ֖יךָ יֹושֵׁ֣ב הָאָ֑רֶץ בָּ֣א הָעֵ֗ת קָרֹ֛וב הַיֹּ֥ום מְהוּמָ֖ה וְלֹא־הֵ֥ד הָרִֽים׃ baʾah hatsefiyrah ʾeleykha yowshev haʾarets baʾ haʿet qarowv hayowm mehumah weloʾ־hed hariym׃
8 עַתָּ֣ה מִקָּרֹ֗וב אֶשְׁפֹּ֤וךְ חֲמָתִי֙ עָלַ֔יִךְ וְכִלֵּיתִ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כָּל־תֹּועֲבֹותָֽיִךְ׃ ʿatah miqarowv ʾeshepowkhe ḥamatiy ʿalayikhe wekhileytiy ʾapiy bakhe ushefaṭetiykhe kiderakhayikhe wenatatiy ʿalayikhe ʾet kal־towʿavowtayikhe׃
9 וְלֹא־תָחֹ֥וס עֵינִ֖י וְלֹ֣א אֶחְמֹ֑ול כִּדְרָכַ֜יִךְ עָלַ֣יִךְ אֶתֵּ֗ן וְתֹועֲבֹותַ֙יִךְ֙ בְּתֹוכֵ֣ךְ תִּֽהְיֶ֔יןָ וִֽידַעְתֶּ֕ם כִּ֛י אֲנִ֥י יְהוָ֖ה מַכֶּֽה׃ weloʾ־taḥows ʿeyniy weloʾ ʾeḥemowl kiderakhayikhe ʿalayikhe ʾeten wetowʿavowtayikhe betowkhekhe tiheyeyna wiydaʿetem kiy ʾaniy yehwah makeh׃
10 הִנֵּ֥ה הַיֹּ֖ום הִנֵּ֣ה בָאָ֑ה יָֽצְאָה֙ הַצְּפִרָ֔ה צָ֚ץ הַמַּטֶּ֔ה פָּרַ֖ח הַזָּדֹֽון׃ hineh hayowm hineh vaʾah yatseʾah hatsefirah tsats hamaṭeh paraḥ hazadown׃
11 הֶחָמָ֥ס ׀ קָ֖ם לְמַטֵּה־רֶ֑שַׁע לֹא־מֵהֶ֞ם וְלֹ֧א מֵהֲמֹונָ֛ם וְלֹ֥א מֶהֱמֵהֶ֖ם וְלֹא־נֹ֥הַּ בָּהֶֽם׃ heḥamas ׀ qam lemaṭeh־reshaʿ loʾ־mehem weloʾ mehamownam weloʾ mehemehem weloʾ־noah bahem׃
12 בָּ֤א הָעֵת֙ הִגִּ֣יעַ הַיֹּ֔ום הַקֹּונֶה֙ אַל־יִשְׂמָ֔ח וְהַמֹּוכֵ֖ר אַל־יִתְאַבָּ֑ל כִּ֥י חָרֹ֖ון אֶל־כָּל־הֲמֹונָֽהּ׃ baʾ haʿet higiyʿa hayowm haqowneh ʾal־yisemaḥ wehamowkher ʾal־yiteʾabal kiy ḥarown ʾel־kal־hamownah׃
13 כִּ֣י הַמֹּוכֵ֗ר אֶל־הַמִּמְכָּר֙ לֹ֣א יָשׁ֔וּב וְעֹ֥וד בַּחַיִּ֖ים חַיָּתָ֑ם כִּֽי־חָזֹ֤ון אֶל־כָּל־הֲמֹונָהּ֙ לֹ֣א יָשׁ֔וּב וְאִ֧ישׁ בַּעֲוֹנֹ֛ו חַיָּתֹ֖ו לֹ֥א יִתְחַזָּֽקוּ׃ kiy hamowkher ʾel־hamimekar loʾ yashuv weʿowd baḥayiym ḥayatam kiy־ḥazown ʾel־kal־hamownah loʾ yashuv weʾiysh baʿaonow ḥayatow loʾ yiteḥazaqu׃
14 תָּקְע֤וּ בַתָּקֹ֙ועַ֙ וְהָכִ֣ין הַכֹּ֔ל וְאֵ֥ין הֹלֵ֖ךְ לַמִּלְחָמָ֑ה כִּ֥י חֲרֹונִ֖י אֶל־כָּל־הֲמֹונָֽהּ׃ taqeʿu vataqowʿa wehakhiyn hakol weʾeyn holekhe lamileḥamah kiy ḥarowniy ʾel־kal־hamownah׃
15 הַחֶ֣רֶב בַּח֔וּץ וְהַדֶּ֥בֶר וְהָרָעָ֖ב מִבָּ֑יִת אֲשֶׁ֤ר בַּשָּׂדֶה֙ בַּחֶ֣רֶב יָמ֔וּת וַאֲשֶׁ֣ר בָּעִ֔יר רָעָ֥ב וָדֶ֖בֶר יֹאכֲלֶֽנּוּ׃ haḥerev baḥuts wehadever weharaʿav mibayit ʾasher basadeh baḥerev yamut waʾasher baʿiyr raʿav wadever yoʾkhalenu׃
16 וּפָֽלְטוּ֙ פְּלִ֣יטֵיהֶ֔ם וְהָי֣וּ אֶל־הֶהָרִ֗ים כְּיֹונֵ֧י הַגֵּאָיֹ֛ות כֻּלָּ֖ם הֹמֹ֑ות אִ֖ישׁ בַּעֲוֹנֹֽו׃ ufaleṭu peliyṭeyhem wehayu ʾel־hehariym keyowney hageʾayowt kulam homowt ʾiysh baʿaonow׃
17 כָּל־הַיָּדַ֖יִם תִּרְפֶּ֑ינָה וְכָל־בִּרְכַּ֖יִם תֵּלַ֥כְנָה מָּֽיִם׃ kal־hayadayim tirepeynah wekhal־birekayim telakhenah mayim׃
18 וְחָגְר֣וּ שַׂקִּ֔ים וְכִסְּתָ֥ה אֹותָ֖ם פַּלָּצ֑וּת וְאֶ֤ל כָּל־פָּנִים֙ בּוּשָׁ֔ה וּבְכָל־רָאשֵׁיהֶ֖ם קָרְחָֽה׃ weḥageru saqiym wekhisetah ʾowtam palatsut weʾel kal־paniym bushah uvekhal־raʾsheyhem qareḥah׃
19 כַּסְפָּ֞ם בַּחוּצֹ֣ות יַשְׁלִ֗יכוּ וּזְהָבָם֮ לְנִדָּ֣ה יִֽהְיֶה֒ כַּסְפָּ֨ם וּזְהָבָ֜ם לֹֽא־יוּכַ֣ל לְהַצִּילָ֗ם בְּיֹום֙ עֶבְרַ֣ת יְהוָ֔ה נַפְשָׁם֙ לֹ֣א יְשַׂבֵּ֔עוּ וּמֵעֵיהֶ֖ם לֹ֣א יְמַלֵּ֑אוּ כִּֽי־מִכְשֹׁ֥ול עֲוֹנָ֖ם הָיָֽה׃ kasepam baḥutsowt yasheliykhu uzehavam lenidah yiheyeh kasepam uzehavam loʾ־yukhal lehatsiylam beyowm ʿeverat yehwah nafesham loʾ yesabeʿu umeʿeyhem loʾ yemaleʾu kiy־mikheshowl ʿaonam hayah׃
20 וּצְבִ֤י עֶדְיֹו֙ לְגָאֹ֣ון שָׂמָ֔הוּ וְצַלְמֵ֧י תֹועֲבֹתָ֛ם שִׁקּוּצֵיהֶ֖ם עָ֣שׂוּ בֹ֑ו עַל־כֵּ֛ן נְתַתִּ֥יו לָהֶ֖ם לְנִדָּֽה׃ utseviy ʿedeyow legaʾown samahu wetsalemey towʿavotam shiqutseyhem ʿasu vow ʿal־ken netatiyw lahem lenidah׃
21 וּנְתַתִּ֤יו בְּיַֽד־הַזָּרִים֙ לָבַ֔ז וּלְרִשְׁעֵ֥י הָאָ֖רֶץ לְשָׁלָ֑ל [וְחִלְּלֻהָ כ] (וְחִלְּלֽוּהוּ׃ ק) unetatiyw beyad־hazariym lavaz ulerisheʿey haʾarets leshalal [weḥileluah kh] (weḥileluhu׃ q)
22 וַהֲסִבֹּותִ֤י פָנַי֙ מֵהֶ֔ם וְחִלְּל֖וּ אֶת־צְפוּנִ֑י וּבָאוּ־בָ֥הּ פָּרִיצִ֖ים וְחִלְּלֽוּהָ׃ פ wahasibowtiy fanay mehem weḥilelu ʾet־tsefuniy uvaʾu־vah pariytsiym weḥileluah׃ f
23 עֲשֵׂ֖ה הָֽרַתֹּ֑וק כִּ֣י הָאָ֗רֶץ מָֽלְאָה֙ מִשְׁפַּ֣ט דָּמִ֔ים וְהָעִ֖יר מָלְאָ֥ה חָמָֽס׃ ʿaseh haratowq kiy haʾarets maleʾah mishepaṭ damiym wehaʿiyr maleʾah ḥamas׃
24 וְהֵֽבֵאתִי֙ רָעֵ֣י גֹויִ֔ם וְיָרְשׁ֖וּ אֶת־בָּֽתֵּיהֶ֑ם וְהִשְׁבַּתִּי֙ גְּאֹ֣ון עַזִּ֔ים וְנִחֲל֖וּ מְקַֽדְשֵׁיהֶֽם׃ weheveʾtiy raʿey gowyim weyareshu ʾet־bateyhem wehishebatiy geʾown ʿaziym weniḥalu meqadesheyhem׃
25 קְפָ֖דָה־בָ֑א וּבִקְשׁ֥וּ שָׁלֹ֖ום וָאָֽיִן׃ qefadah־vaʾ uviqeshu shalowm waʾayin׃
26 הֹוָ֤ה עַל־הֹוָה֙ תָּבֹ֔וא וּשְׁמֻעָ֥ה אֶל־שְׁמוּעָ֖ה תִּֽהְיֶ֑ה וּבִקְשׁ֤וּ חָזֹון֙ מִנָּבִ֔יא וְתֹורָה֙ תֹּאבַ֣ד מִכֹּהֵ֔ן וְעֵצָ֖ה מִזְּקֵנִֽים׃ howah ʿal־howah tavowʾ ushemuʿah ʾel־shemuʿah tiheyeh uviqeshu ḥazown minaviyʾ wetowrah toʾvad mikohen weʿetsah mizeqeniym׃
27 הַמֶּ֣לֶךְ יִתְאַבָּ֗ל וְנָשִׂיא֙ יִלְבַּ֣שׁ שְׁמָמָ֔ה וִידֵ֥י עַם־הָאָ֖רֶץ תִּבָּהַ֑לְנָה מִדַּרְכָּ֞ם אֶעֱשֶׂ֤ה אֹותָם֙ וּבְמִשְׁפְּטֵיהֶ֣ם אֶשְׁפְּטֵ֔ם וְיָדְע֖וּ כִּֽי־אֲנִ֥י יְהוָֽה׃ פ hamelekhe yiteʾabal wenasiyʾ yilebash shemamah wiydey ʿam־haʾarets tibahalenah midarekam ʾeʿeseh ʾowtam uvemishepeṭeyhem ʾeshepeṭem weyadeʿu kiy־ʾaniy yehwah׃ f