Jérémie 33

¹ וַיְהִ֧י דְבַר־יְהוָ֛ה אֶֽל־יִרְמְיָ֖הוּ שֵׁנִ֑ית וְהוּא֙ עֹודֶ֣נּוּ עָצ֔וּר בַּחֲצַ֥ר הַמַּטָּרָ֖ה לֵאמֹֽר׃ wayehiy devar־yehwah ʾel־yiremeyahu sheniyt wehuʾ ʿowdenu ʿatsur baḥatsar hamaṭarah leʾmor׃

² כֹּֽה־אָמַ֥ר יְהוָ֖ה עֹשָׂ֑הּ יְהוָ֗ה יֹוצֵ֥ר אֹותָ֛הּ לַהֲכִינָ֖הּ יְהוָ֥ה שְׁמֹֽו׃ koh־ʾamar yehwah ʿosah yehwah yowtser ʾowtah lahakhiynah yehwah shemow׃

³ קְרָ֥א אֵלַ֖י וְאֶעֱנֶ֑ךָּ וְאַגִּ֧ידָה לְּךָ֛ גְּדֹלֹ֥ות וּבְצֻרֹ֖ות לֹ֥א יְדַעְתָּֽם׃ ס qeraʾ ʾelay weʾeʿeneka weʾagiydah lekha gedolowt uvetsurowt loʾ yedaʿetam׃ s

⁴ כִּי֩ כֹ֨ה אָמַ֤ר יְהוָה֙ אֱלֹהֵ֣י יִשְׂרָאֵ֔ל עַל־בָּתֵּי֙ הָעִ֣יר הַזֹּ֔את וְעַל־בָּתֵּ֖י מַלְכֵ֣י יְהוּדָ֑ה הַנְּתֻצִ֕ים אֶל־הַסֹּלְלֹ֖ות וְאֶל־הֶחָֽרֶב׃ kiy khoh ʾamar yehwah ʾelohey yiseraʾel ʿal־batey haʿiyr hazoʾt weʿal־batey malekhey yehudah hanetutsiym ʾel־hasolelowt weʾel־heḥarev׃

⁵ בָּאִ֗ים לְהִלָּחֵם֙ אֶת־הַכַּשְׂדִּ֔ים וּלְמַלְאָם֙ אֶת־פִּגְרֵ֣י הָאָדָ֔ם אֲשֶׁר־הִכֵּ֥יתִי בְאַפִּ֖י וּבַחֲמָתִ֑י וַאֲשֶׁ֨ר הִסְתַּ֤רְתִּי פָנַי֙ מֵהָעִ֣יר הַזֹּ֔את עַ֖ל כָּל־רָעָתָֽם׃ baʾiym lehilaḥem ʾet־hakasediym ulemaleʾam ʾet־pigerey haʾadam ʾasher־hikeytiy veʾapiy uvaḥamatiy waʾasher hisetaretiy fanay mehaʿiyr hazoʾt ʿal kal־raʿatam׃

⁶ הִנְנִ֧י מַעֲלֶה־לָּ֛הּ אֲרֻכָ֥ה וּמַרְפֵּ֖א וּרְפָאתִ֑ים וְגִלֵּיתִ֣י לָהֶ֔ם עֲתֶ֥רֶת שָׁלֹ֖ום וֶאֱמֶֽת׃ hineniy maʿaleh־lah ʾarukhah umarepeʾ urefaʾtiym wegileytiy lahem ʿateret shalowm weʾemet׃

⁷ וַהֲשִֽׁבֹתִי֙ אֶת־שְׁב֣וּת יְהוּדָ֔ה וְאֵ֖ת שְׁב֣וּת יִשְׂרָאֵ֑ל וּבְנִתִ֖ים כְּבָרִֽאשֹׁנָֽה׃ wahashivotiy ʾet־shevut yehudah weʾet shevut yiseraʾel uvenitiym kevariʾshonah׃

⁸ וְטִ֣הַרְתִּ֔ים מִכָּל־עֲוֹנָ֖ם אֲשֶׁ֣ר חָֽטְאוּ־לִ֑י וְסָלַחְתִּ֗י [לְכֹול־ כ] (לְכָל־עֲוֹנֹֽותֵיהֶם֙ ק) אֲשֶׁ֣ר חָֽטְאוּ־לִ֔י וַאֲשֶׁ֖ר פָּ֥שְׁעוּ בִֽי׃ weṭiharetiym mikal־ʿaonam ʾasher ḥaṭeʾu־liy wesalaḥetiy [lekhowl־ kh] (lekhal־ʿaonowteyhem q) ʾasher ḥaṭeʾu־liy waʾasher pasheʿu viy׃

⁹ וְהָ֣יְתָה לִּ֗י לְשֵׁ֤ם שָׂשֹׂון֙ לִתְהִלָּ֣ה וּלְתִפְאֶ֔רֶת לְכֹ֖ל גֹּויֵ֣י הָאָ֑רֶץ אֲשֶׁ֨ר יִשְׁמְע֜וּ אֶת־כָּל־הַטֹּובָ֗ה אֲשֶׁ֤ר אָֽנֹכִי֙ עֹשֶׂ֣ה אֹתָ֔ם וּפָחֲד֣וּ וְרָֽגְז֗וּ עַ֤ל כָּל־הַטֹּובָה֙ וְעַ֣ל כָּל־הַשָּׁלֹ֔ום אֲשֶׁ֥ר אָֽנֹכִ֖י עֹ֥שֶׂה לָּֽהּ׃ ס wehayetah liy leshem sasown litehilah uletifeʾeret lekhol gowyey haʾarets ʾasher yishemeʿu ʾet־kal־haṭowvah ʾasher ʾanokhiy ʿoseh ʾotam ufaḥadu weragezu ʿal kal־haṭowvah weʿal kal־hashalowm ʾasher ʾanokhiy ʿoseh lah׃ s

¹⁰ כֹּ֣ה ׀ אָמַ֣ר יְהוָ֗ה עֹוד֮ יִשָּׁמַ֣ע בַּמָּקֹום־הַזֶּה֒ אֲשֶׁר֙ אַתֶּ֣ם אֹֽמְרִ֔ים חָרֵ֣ב ה֔וּא מֵאֵ֥ין אָדָ֖ם וּמֵאֵ֣ין בְּהֵמָ֑ה בְּעָרֵ֤י יְהוּדָה֙ וּבְחֻצֹ֣ות יְרוּשָׁלִַ֔ם הַֽנְשַׁמֹּ֗ות מֵאֵ֥ין אָדָ֛ם וּמֵאֵ֥ין יֹושֵׁ֖ב וּמֵאֵ֥ין בְּהֵמָֽה׃ koh ׀ ʾamar yehwah ʿowd yishamaʿ bamaqowm־hazeh ʾasher ʾatem ʾomeriym ḥarev huʾ meʾeyn ʾadam umeʾeyn behemah beʿarey yehudah uveḥutsowt yerushalim haneshamowt meʾeyn ʾadam umeʾeyn yowshev umeʾeyn behemah׃

¹¹ קֹ֣ול שָׂשֹׂ֞ון וְקֹ֣ול שִׂמְחָ֗ה קֹ֣ול חָתָן֮ וְקֹ֣ול כַּלָּה֒ קֹ֣ול אֹמְרִ֡ים הֹודוּ֩ אֶת־יְהוָ֨ה צְבָאֹ֜ות כִּֽי־טֹ֤וב יְהוָה֙ כִּֽי־לְעֹולָ֣ם חַסְדֹּ֔ו מְבִאִ֥ים תֹּודָ֖ה בֵּ֣ית יְהוָ֑ה כִּֽי־אָשִׁ֧יב אֶת־שְׁבוּת־הָאָ֛רֶץ כְּבָרִאשֹׁנָ֖ה אָמַ֥ר יְהוָֽה׃ ס qowl sasown weqowl simeḥah qowl ḥatan weqowl kalah qowl ʾomeriym howdu ʾet־yehwah tsevaʾowt kiy־ṭowv yehwah kiy־leʿowlam ḥasedow meviʾiym towdah beyt yehwah kiy־ʾashiyv ʾet־shevut־haʾarets kevariʾshonah ʾamar yehwah׃ s

¹² כֹּֽה־אָמַר֮ יְהוָ֣ה צְבָאֹות֒ עֹ֞וד יִֽהְיֶ֣ה ׀ בַּמָּקֹ֣ום הַזֶּ֗ה הֶחָרֵ֛ב מֵֽאֵין־אָדָ֥ם וְעַד־בְּהֵמָ֖ה וּבְכָל־עָרָ֑יו נְוֵ֣ה רֹעִ֔ים מַרְבִּצִ֖ים צֹֽאן׃ koh־ʾamar yehwah tsevaʾowt ʿowd yiheyeh ׀ bamaqowm hazeh heḥarev meʾeyn־ʾadam weʿad־behemah uvekhal־ʿarayw neweh roʿiym marebitsiym tsoʾn׃

¹³ בְּעָרֵ֨י הָהָ֜ר בְּעָרֵ֤י הַשְּׁפֵלָה֙ וּבְעָרֵ֣י הַנֶּ֔גֶב וּבְאֶ֧רֶץ בִּנְיָמִ֛ן וּבִסְבִיבֵ֥י יְרוּשָׁלִַ֖ם וּבְעָרֵ֣י יְהוּדָ֑ה עֹ֣ד תַּעֲבֹ֧רְנָה הַצֹּ֛אן עַל־יְדֵ֥י מֹונֶ֖ה אָמַ֥ר יְהוָֽה׃ ס beʿarey hahar beʿarey hashefelah uveʿarey hanegev uveʾerets bineyamin uviseviyvey yerushalim uveʿarey yehudah ʿod taʿavorenah hatsoʾn ʿal־yedey mowneh ʾamar yehwah׃ s

¹⁴ הִנֵּ֛ה יָמִ֥ים בָּאִ֖ים נְאֻם־יְהוָ֑ה וַהֲקִֽמֹתִי֙ אֶת־הַדָּבָ֣ר הַטֹּ֔וב אֲשֶׁ֥ר דִּבַּ֛רְתִּי אֶל־בֵּ֥ית יִשְׂרָאֵ֖ל וְעַל־בֵּ֥ית יְהוּדָֽה׃ hineh yamiym baʾiym neʾum־yehwah wahaqimotiy ʾet־hadavar haṭowv ʾasher dibaretiy ʾel־beyt yiseraʾel weʿal־beyt yehudah׃

¹⁵ בַּיָּמִ֤ים הָהֵם֙ וּבָעֵ֣ת הַהִ֔יא אַצְמִ֥יחַ לְדָוִ֖ד צֶ֣מַח צְדָקָ֑ה וְעָשָׂ֛ה מִשְׁפָּ֥ט וּצְדָקָ֖ה בָּאָֽרֶץ׃ bayamiym hahem uvaʿet hahiyʾ ʾatsemiyḥa ledawid tsemaḥ tsedaqah weʿasah mishepaṭ utsedaqah baʾarets׃

¹⁶ בַּיָּמִ֤ים הָהֵם֙ תִּוָּשַׁ֣ע יְהוּדָ֔ה וִירוּשָׁלִַ֖ם תִּשְׁכֹּ֣ון לָבֶ֑טַח וְזֶ֥ה אֲשֶׁר־יִקְרָא־לָ֖הּ יְהוָ֥ה ׀ צִדְקֵֽנוּ׃ ס bayamiym hahem tiuashaʿ yehudah wiyrushalim tishekown laveṭaḥ wezeh ʾasher־yiqeraʾ־lah yehwah ׀ tsideqenu׃ s

¹⁷ כִּי־כֹ֖ה אָמַ֣ר יְהוָ֑ה לֹֽא־יִכָּרֵ֣ת לְדָוִ֔ד אִ֕ישׁ יֹשֵׁ֖ב עַל־כִּסֵּ֥א בֵֽית־יִשְׂרָאֵֽל׃ kiy־khoh ʾamar yehwah loʾ־yikaret ledawid ʾiysh yoshev ʿal־kiseʾ veyt־yiseraʾel׃

¹⁸ וְלַכֹּהֲנִים֙ הַלְוִיִּ֔ם לֹֽא־יִכָּרֵ֥ת אִ֖ישׁ מִלְּפָנָ֑י מַעֲלֶ֨ה עֹולָ֜ה וּמַקְטִ֥יר מִנְחָ֛ה וְעֹֽשֶׂה־זֶּ֖בַח כָּל־הַיָּמִֽים׃ ס welakohaniym halewiyim loʾ־yikaret ʾiysh milefanay maʿaleh ʿowlah umaqeṭiyr mineḥah weʿoseh־zevaḥ kal־hayamiym׃ s

¹⁹ וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽור׃ wayehiy devar־yehwah ʾel־yiremeyahu leʾmowr׃

²⁰ כֹּ֚ה אָמַ֣ר יְהוָ֔ה אִם־תָּפֵ֙רוּ֙ אֶת־בְּרִיתִ֣י הַיֹּ֔ום וְאֶת־בְּרִיתִ֖י הַלָּ֑יְלָה וּלְבִלְתִּ֛י הֱיֹ֥ות יֹֽומָם־וָלַ֖יְלָה בְּעִתָּֽם׃ koh ʾamar yehwah ʾim־taferu ʾet־beriytiy hayowm weʾet־beriytiy halayelah uleviletiy heyowt yowmam־walayelah beʿitam׃

²¹ גַּם־בְּרִיתִ֤י תֻפַר֙ אֶת־דָּוִ֣ד עַבְדִּ֔י מִהְיֹֽות־לֹ֥ו בֵ֖ן מֹלֵ֣ךְ עַל־כִּסְאֹ֑ו וְאֶת־הַלְוִיִּ֥ם הַכֹּהֲנִ֖ים מְשָׁרְתָֽי׃ gam־beriytiy tufar ʾet־dawid ʿavediy miheyowt־low ven molekhe ʿal־kiseʾow weʾet־halewiyim hakohaniym mesharetay׃

²² אֲשֶׁ֤ר לֹֽא־יִסָּפֵר֙ צְבָ֣א הַשָּׁמַ֔יִם וְלֹ֥א יִמַּ֖ד חֹ֣ול הַיָּ֑ם כֵּ֣ן אַרְבֶּ֗ה אֶת־זֶ֙רַע֙ דָּוִ֣ד עַבְדִּ֔י וְאֶת־הַלְוִיִּ֖ם מְשָׁרְתֵ֥י אֹתִֽי׃ ס ʾasher loʾ־yisafer tsevaʾ hashamayim weloʾ yimad ḥowl hayam ken ʾarebeh ʾet־zeraʿ dawid ʿavediy weʾet־halewiyim mesharetey ʾotiy׃ s

²³ וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽר׃ wayehiy devar־yehwah ʾel־yiremeyahu leʾmor׃

²⁴ הֲלֹ֣וא רָאִ֗יתָ מָֽה־הָעָ֤ם הַזֶּה֙ דִּבְּר֣וּ לֵאמֹ֔ר שְׁתֵּ֣י הַמִּשְׁפָּחֹ֗ות אֲשֶׁ֨ר בָּחַ֧ר יְהוָ֛ה בָּהֶ֖ם וַיִּמְאָסֵ֑ם וְאֶת־עַמִּי֙ יִנְאָצ֔וּן מִֽהְיֹ֥ות עֹ֖וד גֹּ֥וי לִפְנֵיהֶֽם׃ ס halowʾ raʾiyta mah־haʿam hazeh diberu leʾmor shetey hamishepaḥowt ʾasher baḥar yehwah bahem wayimeʾasem weʾet־ʿamiy yineʾatsun miheyowt ʿowd gowy lifeneyhem׃ s

²⁵ כֹּ֚ה אָמַ֣ר יְהוָ֔ה אִם־לֹ֥א בְרִיתִ֖י יֹומָ֣ם וָלָ֑יְלָה חֻקֹּ֛ות שָׁמַ֥יִם וָאָ֖רֶץ לֹא־שָֽׂמְתִּי׃ koh ʾamar yehwah ʾim־loʾ veriytiy yowmam walayelah ḥuqowt shamayim waʾarets loʾ־sametiy׃

²⁶ גַּם־זֶ֣רַע יַעֲקֹוב֩ וְדָוִ֨ד עַבְדִּ֜י אֶמְאַ֗ס מִקַּ֤חַת מִזַּרְעֹו֙ מֹֽשְׁלִ֔ים אֶל־זֶ֥רַע אַבְרָהָ֖ם יִשְׂחָ֣ק וְיַעֲקֹ֑ב כִּֽי־ [אָשׁוּב כ] (אָשִׁ֥יב ק) אֶת־שְׁבוּתָ֖ם וְרִחַמְתִּֽים׃ ס gam־zeraʿ yaʿaqowv wedawid ʿavediy ʾemeʾas miqaḥat mizareʿow mosheliym ʾel־zeraʿ ʾaveraham yiseḥaq weyaʿaqov kiy־ [ʾashuv kh] (ʾashiyv q) ʾet־shevutam weriḥametiym׃ s