Jérémie 37

¹ וַיִּ֨מְלָךְ־מֶ֔לֶךְ צִדְקִיָּ֖הוּ בֶּן־יֹֽאשִׁיָּ֑הוּ תַּ֗חַת כָּנְיָ֙הוּ֙ בֶּן־יְהֹ֣ויָקִ֔ים אֲשֶׁ֥ר הִמְלִ֛יךְ נְבוּכַדְרֶאצַּ֥ר מֶֽלֶךְ־בָּבֶ֖ל בְּאֶ֥רֶץ יְהוּדָֽה׃ wayimelakhe־melekhe tsideqiyahu ben־yoʾshiyahu taḥat kaneyahu ben־yehowyaqiym ʾasher himeliykhe nevukhadereʾtsar melekhe־bavel beʾerets yehudah׃

² וְלֹ֥א שָׁמַ֛ע ה֥וּא וַעֲבָדָ֖יו וְעַ֣ם הָאָ֑רֶץ אֶל־דִּבְרֵ֣י יְהוָ֔ה אֲשֶׁ֣ר דִּבֶּ֔ר בְּיַ֖ד יִרְמְיָ֥הוּ הַנָּבִֽיא׃ weloʾ shamaʿ huʾ waʿavadayw weʿam haʾarets ʾel־diverey yehwah ʾasher diber beyad yiremeyahu hanaviyʾ׃

³ וַיִּשְׁלַח֩ הַמֶּ֨לֶךְ צִדְקִיָּ֜הוּ אֶת־יְהוּכַ֣ל בֶּן־שֶֽׁלֶמְיָ֗ה וְאֶת־צְפַנְיָ֤הוּ בֶן־מַֽעֲשֵׂיָה֙ הַכֹּהֵ֔ן אֶל־יִרְמְיָ֥הוּ הַנָּבִ֖יא לֵאמֹ֑ר הִתְפַּלֶּל־נָ֣א בַעֲדֵ֔נוּ אֶל־יְהוָ֖ה אֱלֹהֵֽינוּ׃ wayishelaḥ hamelekhe tsideqiyahu ʾet־yehukhal ben־shelemeyah weʾet־tsefaneyahu ven־maʿaseyah hakohen ʾel־yiremeyahu hanaviyʾ leʾmor hitepalel־naʾ vaʿadenu ʾel־yehwah ʾeloheynu׃

⁴ וְיִרְמְיָ֕הוּ בָּ֥א וְיֹצֵ֖א בְּתֹ֣וךְ הָעָ֑ם וְלֹֽא־נָתְנ֥וּ אֹתֹ֖ו בֵּ֥ית [הַכְּלִיא כ] (הַכְּלֽוּא׃ ק) weyiremeyahu baʾ weyotseʾ betowkhe haʿam weloʾ־natenu ʾotow beyt [hakeliyʾ kh] (hakeluʾ׃ q)

⁵ וְחֵ֥יל פַּרְעֹ֖ה יָצָ֣א מִמִּצְרָ֑יִם וַיִּשְׁמְע֨וּ הַכַּשְׂדִּ֜ים הַצָּרִ֤ים עַל־יְרוּשָׁלִַ֙ם֙ אֶת־שִׁמְעָ֔ם וַיֵּ֣עָל֔וּ מֵעַ֖ל יְרוּשָׁלִָֽם׃ פ weḥeyl pareʿoh yatsaʾ mimitserayim wayishemeʿu hakasediym hatsariym ʿal־yerushalim ʾet־shimeʿam wayeʿalu meʿal yerushalim׃ f

⁶ וַֽיְהִי֙ דְּבַר־יְהוָ֔ה אֶל־יִרְמְיָ֥הוּ הַנָּבִ֖יא לֵאמֹֽר׃ wayehiy devar־yehwah ʾel־yiremeyahu hanaviyʾ leʾmor׃

⁷ כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל כֹּ֚ה תֹֽאמְרוּ֙ אֶל־מֶ֣לֶךְ יְהוּדָ֔ה הַשֹּׁלֵ֧חַ אֶתְכֶ֛ם אֵלַ֖י לְדָרְשֵׁ֑נִי הִנֵּ֣ה ׀ חֵ֣יל פַּרְעֹ֗ה הַיֹּצֵ֤א לָכֶם֙ לְעֶזְרָ֔ה שָׁ֥ב לְאַרְצֹ֖ו מִצְרָֽיִם׃ koh־ʾamar yehwah ʾelohey yiseraʾel koh toʾmeru ʾel־melekhe yehudah hasholeaḥ ʾetekhem ʾelay ledaresheniy hineh ׀ ḥeyl pareʿoh hayotseʾ lakhem leʿezerah shav leʾaretsow mitserayim׃

⁸ וְשָׁ֙בוּ֙ הַכַּשְׂדִּ֔ים וְנִלְחֲמ֖וּ עַל־הָעִ֣יר הַזֹּ֑את וּלְכָדֻ֖הָ וּשְׂרָפֻ֥הָ בָאֵֽשׁ׃ ס weshavu hakasediym wenileḥamu ʿal־haʿiyr hazoʾt ulekhaduah userafuah vaʾesh׃ s

⁹ כֹּ֣ה ׀ אָמַ֣ר יְהוָ֗ה אַל־תַּשִּׁ֤אוּ נַפְשֹֽׁתֵיכֶם֙ לֵאמֹ֔ר הָלֹ֛ךְ יֵלְכ֥וּ מֵעָלֵ֖ינוּ הַכַּשְׂדִּ֑ים כִּי־לֹ֖א יֵלֵֽכוּ׃ koh ׀ ʾamar yehwah ʾal־tashiʾu nafeshoteykhem leʾmor halokhe yelekhu meʿaleynu hakasediym kiy־loʾ yelekhu׃

¹⁰ כִּ֣י אִם־הִכִּיתֶ֞ם כָּל־חֵ֤יל כַּשְׂדִּים֙ הַנִּלְחָמִ֣ים אִתְּכֶ֔ם וְנִ֨שְׁאֲרוּ בָ֔ם אֲנָשִׁ֖ים מְדֻקָּרִ֑ים אִ֤ישׁ בְּאָהֳלֹו֙ יָק֔וּמוּ וְשָֽׂרְפ֛וּ אֶת־הָעִ֥יר הַזֹּ֖את בָּאֵֽשׁ׃ kiy ʾim־hikiytem kal־ḥeyl kasediym hanileḥamiym ʾitekhem wenisheʾaru vam ʾanashiym meduqariym ʾiysh beʾaholow yaqumu wesarefu ʾet־haʿiyr hazoʾt baʾesh׃

¹¹ וְהָיָ֗ה בְּהֵֽעָלֹות֙ חֵ֣יל הַכַּשְׂדִּ֔ים מֵעַ֖ל יְרֽוּשָׁלִָ֑ם מִפְּנֵ֖י חֵ֥יל פַּרְעֹֽה׃ ס wehayah beheʿalowt ḥeyl hakasediym meʿal yerushalim mipeney ḥeyl pareʿoh׃ s

¹² וַיֵּצֵ֤א יִרְמְיָ֙הוּ֙ מִיר֣וּשָׁלִַ֔ם לָלֶ֖כֶת אֶ֣רֶץ בִּנְיָמִ֑ן לַחֲלִ֥ק מִשָּׁ֖ם בְּתֹ֥וךְ הָעָֽם׃ wayetseʾ yiremeyahu miyrushalim lalekhet ʾerets bineyamin laḥaliq misham betowkhe haʿam׃

¹³ וַיְהִי־ה֞וּא בְּשַׁ֣עַר בִּנְיָמִ֗ן וְשָׁם֙ בַּ֣עַל פְּקִדֻ֔ת וּשְׁמֹו֙ יִרְאִיָּ֔יה בֶּן־שֶֽׁלֶמְיָ֖ה בֶּן־חֲנַנְיָ֑ה וַיִּתְפֹּ֞שׂ אֶֽת־יִרְמְיָ֤הוּ הַנָּבִיא֙ לֵאמֹ֔ר אֶל־הַכַּשְׂדִּ֖ים אַתָּ֥ה נֹפֵֽל׃ wayehiy־huʾ beshaʿar bineyamin wesham baʿal peqidut ushemow yireʾiyayh ben־shelemeyah ben־ḥananeyah wayitepos ʾet־yiremeyahu hanaviyʾ leʾmor ʾel־hakasediym ʾatah nofel׃

¹⁴ וַיֹּ֨אמֶר יִרְמְיָ֜הוּ שֶׁ֗קֶר אֵינֶ֤נִּי נֹפֵל֙ עַל־הַכַּשְׂדִּ֔ים וְלֹ֥א שָׁמַ֖ע אֵלָ֑יו וַיִּתְפֹּ֤שׂ יִרְאִיָּיה֙ בְּיִרְמְיָ֔הוּ וַיְבִאֵ֖הוּ אֶל־הַשָּׂרִֽים׃ wayoʾmer yiremeyahu sheqer ʾeyneniy nofel ʿal־hakasediym weloʾ shamaʿ ʾelayw wayitepos yireʾiyayh beyiremeyahu wayeviʾehu ʾel־hasariym׃

¹⁵ וַיִּקְצְפ֧וּ הַשָּׂרִ֛ים עַֽל־יִרְמְיָ֖הוּ וְהִכּ֣וּ אֹתֹ֑ו וְנָתְנ֨וּ אֹותֹ֜ו בֵּ֣ית הָאֵס֗וּר בֵּ֚ית יְהֹונָתָ֣ן הַסֹּפֵ֔ר כִּֽי־אֹתֹ֥ו עָשׂ֖וּ לְבֵ֥ית הַכֶּֽלֶא׃ wayiqetsefu hasariym ʿal־yiremeyahu wehiku ʾotow wenatenu ʾowtow beyt haʾesur beyt yehownatan hasofer kiy־ʾotow ʿasu leveyt hakeleʾ׃

¹⁶ כִּ֣י בָ֧א יִרְמְיָ֛הוּ אֶל־בֵּ֥ית הַבֹּ֖ור וְאֶל־הַֽחֲנֻ֑יֹות וַיֵּֽשֶׁב־שָׁ֥ם יִרְמְיָ֖הוּ יָמִ֥ים רַבִּֽים׃ פ kiy vaʾ yiremeyahu ʾel־beyt habowr weʾel־haḥanuyowt wayeshev־sham yiremeyahu yamiym rabiym׃ f

¹⁷ וַיִּשְׁלַח֩ הַמֶּ֨לֶךְ צִדְקִיָּ֜הוּ וַיִּקָּחֵ֗הוּ וַיִּשְׁאָלֵ֨הוּ הַמֶּ֤לֶךְ בְּבֵיתֹו֙ בַּסֵּ֔תֶר וַיֹּ֕אמֶר הֲיֵ֥שׁ דָּבָ֖ר מֵאֵ֣ת יְהוָ֑ה וַיֹּ֤אמֶר יִרְמְיָ֙הוּ֙ יֵ֔שׁ וַיֹּ֕אמֶר בְּיַ֥ד מֶֽלֶךְ־בָּבֶ֖ל תִּנָּתֵֽן׃ ס wayishelaḥ hamelekhe tsideqiyahu wayiqaḥehu wayisheʾalehu hamelekhe beveytow baseter wayoʾmer hayesh davar meʾet yehwah wayoʾmer yiremeyahu yesh wayoʾmer beyad melekhe־bavel tinaten׃ s

¹⁸ וַיֹּ֣אמֶר יִרְמְיָ֔הוּ אֶל־הַמֶּ֖לֶךְ צִדְקִיָּ֑הוּ מֶה֩ חָטָ֨אתִֽי לְךָ֤ וְלַעֲבָדֶ֙יךָ֙ וְלָעָ֣ם הַזֶּ֔ה כִּֽי־נְתַתֶּ֥ם אֹותִ֖י אֶל־בֵּ֥ית הַכֶּֽלֶא׃ wayoʾmer yiremeyahu ʾel־hamelekhe tsideqiyahu meh ḥaṭaʾtiy lekha welaʿavadeykha welaʿam hazeh kiy־netatem ʾowtiy ʾel־beyt hakeleʾ׃

¹⁹ [וְאַיֹּו כ] (וְאַיֵּה֙ ק) נְבִ֣יאֵיכֶ֔ם אֲשֶׁר־נִבְּא֥וּ לָכֶ֖ם לֵאמֹ֑ר לֹֽא־יָבֹ֤א מֶֽלֶךְ־בָּבֶל֙ עֲלֵיכֶ֔ם וְעַ֖ל הָאָ֥רֶץ הַזֹּֽאת׃ [weʾayow kh] (weʾayeh q) neviyʾeykhem ʾasher־nibeʾu lakhem leʾmor loʾ־yavoʾ melekhe־bavel ʿaleykhem weʿal haʾarets hazoʾt׃

²⁰ וְעַתָּ֕ה שְֽׁמַֽע־נָ֖א אֲדֹנִ֣י הַמֶּ֑לֶךְ תִּפָּל־נָ֤א תְחִנָּתִי֙ לְפָנֶ֔יךָ וְאַל־תְּשִׁבֵ֗נִי בֵּ֚ית יְהֹונָתָ֣ן הַסֹּפֵ֔ר וְלֹ֥א אָמ֖וּת שָֽׁם׃ weʿatah shemaʿ־naʾ ʾadoniy hamelekhe tipal־naʾ teḥinatiy lefaneykha weʾal־teshiveniy beyt yehownatan hasofer weloʾ ʾamut sham׃

²¹ וַיְצַוֶּ֞ה הַמֶּ֣לֶךְ צִדְקִיָּ֗הוּ וַיַּפְקִ֣דוּ אֶֽת־יִרְמְיָהוּ֮ בַּחֲצַ֣ר הַמַּטָּרָה֒ וְנָתֹן֩ לֹ֨ו כִכַּר־לֶ֤חֶם לַיֹּום֙ מִח֣וּץ הָאֹפִ֔ים עַד־תֹּ֥ם כָּל־הַלֶּ֖חֶם מִן־הָעִ֑יר וַיֵּ֣שֶׁב יִרְמְיָ֔הוּ בַּחֲצַ֖ר הַמַּטָּרָֽה׃ wayetsaueh hamelekhe tsideqiyahu wayafeqidu ʾet־yiremeyahu baḥatsar hamaṭarah wenaton low khikar־leḥem layowm miḥuts haʾofiym ʿad־tom kal־haleḥem min־haʿiyr wayeshev yiremeyahu baḥatsar hamaṭarah׃