Exode 38

¹ וַיַּ֛עַשׂ אֶת־מִזְבַּ֥ח הָעֹלָ֖ה עֲצֵ֣י שִׁטִּ֑ים חָמֵשׁ֩ אַמֹּ֨ות אָרְכֹּ֜ו וְחָֽמֵשׁ־אַמֹּ֤ות רָחְבֹּו֙ רָב֔וּעַ וְשָׁלֹ֥שׁ אַמֹּ֖ות קֹמָתֹֽו׃ wayaʿas ʾet־mizebaḥ haʿolah ʿatsey shiṭiym ḥamesh ʾamowt ʾarekow weḥamesh־ʾamowt raḥebow ravuaʿ weshalosh ʾamowt qomatow׃

² וַיַּ֣עַשׂ קַרְנֹתָ֗יו עַ֚ל אַרְבַּ֣ע פִּנֹּתָ֔יו מִמֶּ֖נּוּ הָי֣וּ קַרְנֹתָ֑יו וַיְצַ֥ף אֹתֹ֖ו נְחֹֽשֶׁת׃ wayaʿas qarenotayw ʿal ʾarebaʿ pinotayw mimenu hayu qarenotayw wayetsaf ʾotow neḥoshet׃

³ וַיַּ֜עַשׂ אֶֽת־כָּל־כְּלֵ֣י הַמִּזְבֵּ֗חַ אֶת־הַסִּירֹ֤ת וְאֶת־הַיָּעִים֙ וְאֶת־הַמִּזְרָקֹ֔ת אֶת־הַמִּזְלָגֹ֖ת וְאֶת־הַמַּחְתֹּ֑ת כָּל־כֵּלָ֖יו עָשָׂ֥ה נְחֹֽשֶׁת׃ wayaʿas ʾet־kal־keley hamizebeaḥ ʾet־hasiyrot weʾet־hayaʿiym weʾet־hamizeraqot ʾet־hamizelagot weʾet־hamaḥetot kal־kelayw ʿasah neḥoshet׃

⁴ וַיַּ֤עַשׂ לַמִּזְבֵּ֙חַ֙ מִכְבָּ֔ר מַעֲשֵׂ֖ה רֶ֣שֶׁת נְחֹ֑שֶׁת תַּ֧חַת כַּרְכֻּבֹּ֛ו מִלְּמַ֖טָּה עַד־חֶצְיֹֽו׃ wayaʿas lamizebeaḥ mikhebar maʿaseh reshet neḥoshet taḥat karekubow milemaṭah ʿad־ḥetseyow׃

⁵ וַיִּצֹ֞ק אַרְבַּ֧ע טַבָּעֹ֛ת בְּאַרְבַּ֥ע הַקְּצָוֹ֖ת לְמִכְבַּ֣ר הַנְּחֹ֑שֶׁת בָּתִּ֖ים לַבַּדִּֽים׃ wayitsoq ʾarebaʿ ṭabaʿot beʾarebaʿ haqetsaot lemikhebar haneḥoshet batiym labadiym׃

⁶ וַיַּ֥עַשׂ אֶת־הַבַּדִּ֖ים עֲצֵ֣י שִׁטִּ֑ים וַיְצַ֥ף אֹתָ֖ם נְחֹֽשֶׁת׃ wayaʿas ʾet־habadiym ʿatsey shiṭiym wayetsaf ʾotam neḥoshet׃

⁷ וַיָּבֵ֨א אֶת־הַבַּדִּ֜ים בַּטַּבָּעֹ֗ת עַ֚ל צַלְעֹ֣ת הַמִּזְבֵּ֔חַ לָשֵׂ֥את אֹתֹ֖ו בָּהֶ֑ם נְב֥וּב לֻחֹ֖ת עָשָׂ֥ה אֹתֹֽו׃ ס wayaveʾ ʾet־habadiym baṭabaʿot ʿal tsaleʿot hamizebeaḥ laseʾt ʾotow bahem nevuv luḥot ʿasah ʾotow׃ s

⁸ וַיַּ֗עַשׂ אֵ֚ת הַכִּיֹּ֣ור נְחֹ֔שֶׁת וְאֵ֖ת כַּנֹּ֣ו נְחֹ֑שֶׁת בְּמַרְאֹת֙ הַצֹּ֣בְאֹ֔ת אֲשֶׁ֣ר צָֽבְא֔וּ פֶּ֖תַח אֹ֥הֶל מֹועֵֽד׃ ס wayaʿas ʾet hakiyowr neḥoshet weʾet kanow neḥoshet bemareʾot hatsoveʾot ʾasher tsaveʾu petaḥ ʾohel mowʿed׃ s

⁹ וַיַּ֖עַשׂ אֶת־הֶחָצֵ֑ר לִפְאַ֣ת ׀ נֶ֣גֶב תֵּימָ֗נָה קַלְעֵ֤י הֶֽחָצֵר֙ שֵׁ֣שׁ מָשְׁזָ֔ר מֵאָ֖ה בָּאַמָּֽה׃ wayaʿas ʾet־heḥatser lifeʾat ׀ negev teymanah qaleʿey heḥatser shesh mashezar meʾah baʾamah׃

¹⁰ עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָעַמֻּדִ֛ים וַחֲשֻׁקֵיהֶ֖ם כָּֽסֶף׃ ʿamudeyhem ʿeseriym weʾadeneyhem ʿeseriym neḥoshet wawey haʿamudiym waḥashuqeyhem kasef׃

¹¹ וְלִפְאַ֤ת צָפֹון֙ מֵאָ֣ה בָֽאַמָּ֔ה עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָֽעַמּוּדִ֛ים וַחֲשֻׁקֵיהֶ֖ם כָּֽסֶף׃ welifeʾat tsafown meʾah vaʾamah ʿamudeyhem ʿeseriym weʾadeneyhem ʿeseriym neḥoshet wawey haʿamudiym waḥashuqeyhem kasef׃

¹² וְלִפְאַת־יָ֗ם קְלָעִים֙ חֲמִשִּׁ֣ים בָּֽאַמָּ֔ה עַמּוּדֵיהֶ֥ם עֲשָׂרָ֔ה וְאַדְנֵיהֶ֖ם עֲשָׂרָ֑ה וָוֵ֧י הָעַמֻּדִ֛ים וַחֲשׁוּקֵיהֶ֖ם כָּֽסֶף׃ welifeʾat־yam qelaʿiym ḥamishiym baʾamah ʿamudeyhem ʿasarah weʾadeneyhem ʿasarah wawey haʿamudiym waḥashuqeyhem kasef׃

¹³ וְלִפְאַ֛ת קֵ֥דְמָה מִזְרָ֖חָה חֲמִשִּׁ֥ים אַמָּֽה׃ welifeʾat qedemah mizeraḥah ḥamishiym ʾamah׃

¹⁴ קְלָעִ֛ים חֲמֵשׁ־עֶשְׂרֵ֥ה אַמָּ֖ה אֶל־הַכָּתֵ֑ף עַמּוּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃ qelaʿiym ḥamesh־ʿesereh ʾamah ʾel־hakatef ʿamudeyhem sheloshah weʾadeneyhem sheloshah׃

¹⁵ וְלַכָּתֵ֣ף הַשֵּׁנִ֗ית מִזֶּ֤ה וּמִזֶּה֙ לְשַׁ֣עַר הֶֽחָצֵ֔ר קְלָעִ֕ים חֲמֵ֥שׁ עֶשְׂרֵ֖ה אַמָּ֑ה עַמֻּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃ welakatef hasheniyt mizeh umizeh leshaʿar heḥatser qelaʿiym ḥamesh ʿesereh ʾamah ʿamudeyhem sheloshah weʾadeneyhem sheloshah׃

¹⁶ כָּל־קַלְעֵ֧י הֶחָצֵ֛ר סָבִ֖יב שֵׁ֥שׁ מָשְׁזָֽר׃ kal־qaleʿey heḥatser saviyv shesh mashezar׃

¹⁷ וְהָאֲדָנִ֣ים לָֽעַמֻּדִים֮ נְחֹשֶׁת֒ וָוֵ֨י הָֽעַמּוּדִ֜ים וַחֲשׁוּקֵיהֶם֙ כֶּ֔סֶף וְצִפּ֥וּי רָאשֵׁיהֶ֖ם כָּ֑סֶף וְהֵם֙ מְחֻשָּׁקִ֣ים כֶּ֔סֶף כֹּ֖ל עַמֻּדֵ֥י הֶחָצֵֽר׃ wehaʾadaniym laʿamudiym neḥoshet wawey haʿamudiym waḥashuqeyhem kesef wetsipuy raʾsheyhem kasef wehem meḥushaqiym kesef kol ʿamudey heḥatser׃

¹⁸ וּמָסַ֞ךְ שַׁ֤עַר הֶחָצֵר֙ מַעֲשֵׂ֣ה רֹקֵ֔ם תְּכֵ֧לֶת וְאַרְגָּמָ֛ן וְתֹולַ֥עַת שָׁנִ֖י וְשֵׁ֣שׁ מָשְׁזָ֑ר וְעֶשְׂרִ֤ים אַמָּה֙ אֹ֔רֶךְ וְקֹומָ֤ה בְרֹ֙חַב֙ חָמֵ֣שׁ אַמֹּ֔ות לְעֻמַּ֖ת קַלְעֵ֥י הֶחָצֵֽר׃ umasakhe shaʿar heḥatser maʿaseh roqem tekhelet weʾaregaman wetowlaʿat shaniy weshesh mashezar weʿeseriym ʾamah ʾorekhe weqowmah veroḥav ḥamesh ʾamowt leʿumat qaleʿey heḥatser׃

¹⁹ וְעַמֻּֽדֵיהֶם֙ אַרְבָּעָ֔ה וְאַדְנֵיהֶ֥ם אַרְבָּעָ֖ה נְחֹ֑שֶׁת וָוֵיהֶ֣ם כֶּ֔סֶף וְצִפּ֧וּי רָאשֵׁיהֶ֛ם וַחֲשֻׁקֵיהֶ֖ם כָּֽסֶף׃ weʿamudeyhem ʾarebaʿah weʾadeneyhem ʾarebaʿah neḥoshet waweyhem kesef wetsipuy raʾsheyhem waḥashuqeyhem kasef׃

²⁰ וְֽכָל־הַיְתֵדֹ֞ת לַמִּשְׁכָּ֧ן וְלֶחָצֵ֛ר סָבִ֖יב נְחֹֽשֶׁת׃ ס wekhal־hayetedot lamishekan weleḥatser saviyv neḥoshet׃ s

²¹ אֵ֣לֶּה פְקוּדֵ֤י הַמִּשְׁכָּן֙ מִשְׁכַּ֣ן הָעֵדֻ֔ת אֲשֶׁ֥ר פֻּקַּ֖ד עַל־פִּ֣י מֹשֶׁ֑ה עֲבֹדַת֙ הַלְוִיִּ֔ם בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן׃ ʾeleh fequdey hamishekan mishekan haʿedut ʾasher puqad ʿal־piy mosheh ʿavodat halewiyim beyad ʾiytamar ben־ʾaharon hakohen׃

²² וּבְצַלְאֵ֛ל בֶּן־אוּרִ֥י בֶן־ח֖וּר לְמַטֵּ֣ה יְהוּדָ֑ה עָשָׂ֕ה אֵ֛ת כָּל־אֲשֶׁר־צִוָּ֥ה יְהוָ֖ה אֶת־מֹשֶֽׁה׃ uvetsaleʾel ben־ʾuriy ven־ḥur lemaṭeh yehudah ʿasah ʾet kal־ʾasher־tsiuah yehwah ʾet־mosheh׃

²³ וְאִתֹּ֗ו אָהֳלִיאָ֞ב בֶּן־אֲחִיסָמָ֛ךְ לְמַטֵּה־דָ֖ן חָרָ֣שׁ וְחֹשֵׁ֑ב וְרֹקֵ֗ם בַּתְּכֵ֙לֶת֙ וּבָֽאַרְגָּמָ֔ן וּבְתֹולַ֥עַת הַשָּׁנִ֖י וּבַשֵּֽׁשׁ׃ ס weʾitow ʾaholiyʾav ben־ʾaḥiysamakhe lemaṭeh־dan ḥarash weḥoshev weroqem batekhelet uvaʾaregaman uvetowlaʿat hashaniy uvashesh׃ s

²⁴ כָּל־הַזָּהָ֗ב הֶֽעָשׂוּי֙ לַמְּלָאכָ֔ה בְּכֹ֖ל מְלֶ֣אכֶת הַקֹּ֑דֶשׁ וַיְהִ֣י ׀ זְהַ֣ב הַתְּנוּפָ֗ה תֵּ֤שַׁע וְעֶשְׂרִים֙ כִּכָּ֔ר וּשְׁבַ֨ע מֵאֹ֧ות וּשְׁלֹשִׁ֛ים שֶׁ֖קֶל בְּשֶׁ֥קֶל הַקֹּֽדֶשׁ׃ kal־hazahav heʿasuy lamelaʾkhah bekhol meleʾkhet haqodesh wayehiy ׀ zehav hatenufah teshaʿ weʿeseriym kikar ushevaʿ meʾowt usheloshiym sheqel besheqel haqodesh׃

²⁵ וְכֶ֛סֶף פְּקוּדֵ֥י הָעֵדָ֖ה מְאַ֣ת כִּכָּ֑ר וְאֶלֶף֩ וּשְׁבַ֨ע מֵאֹ֜ות וַחֲמִשָּׁ֧ה וְשִׁבְעִ֛ים שֶׁ֖קֶל בְּשֶׁ֥קֶל הַקֹּֽדֶשׁ׃ wekhesef pequdey haʿedah meʾat kikar weʾelef ushevaʿ meʾowt waḥamishah weshiveʿiym sheqel besheqel haqodesh׃

²⁶ בֶּ֚קַע לַגֻּלְגֹּ֔לֶת מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ לְכֹ֨ל הָעֹבֵ֜ר עַל־הַפְּקֻדִ֗ים מִבֶּ֨ן עֶשְׂרִ֤ים שָׁנָה֙ וָמַ֔עְלָה לְשֵׁשׁ־מֵאֹ֥ות אֶ֙לֶף֙ וּשְׁלֹ֣שֶׁת אֲלָפִ֔ים וַחֲמֵ֥שׁ מֵאֹ֖ות וַחֲמִשִּֽׁים׃ beqaʿ lagulegolet maḥatsiyt hasheqel besheqel haqodesh lekhol haʿover ʿal־hapequdiym miben ʿeseriym shanah wamaʿelah leshesh־meʾowt ʾelef usheloshet ʾalafiym waḥamesh meʾowt waḥamishiym׃

²⁷ וַיְהִ֗י מְאַת֙ כִּכַּ֣ר הַכֶּ֔סֶף לָצֶ֗קֶת אֵ֚ת אַדְנֵ֣י הַקֹּ֔דֶשׁ וְאֵ֖ת אַדְנֵ֣י הַפָּרֹ֑כֶת מְאַ֧ת אֲדָנִ֛ים לִמְאַ֥ת הַכִּכָּ֖ר כִּכָּ֥ר לָאָֽדֶן׃ wayehiy meʾat kikar hakesef latseqet ʾet ʾadeney haqodesh weʾet ʾadeney haparokhet meʾat ʾadaniym limeʾat hakikar kikar laʾaden׃

²⁸ וְאֶת־הָאֶ֜לֶף וּשְׁבַ֤ע הַמֵּאֹות֙ וַחֲמִשָּׁ֣ה וְשִׁבְעִ֔ים עָשָׂ֥ה וָוִ֖ים לָעַמּוּדִ֑ים וְצִפָּ֥ה רָאשֵׁיהֶ֖ם וְחִשַּׁ֥ק אֹתָֽם׃ weʾet־haʾelef ushevaʿ hameʾowt waḥamishah weshiveʿiym ʿasah wawiym laʿamudiym wetsipah raʾsheyhem weḥishaq ʾotam׃

²⁹ וּנְחֹ֥שֶׁת הַתְּנוּפָ֖ה שִׁבְעִ֣ים כִּכָּ֑ר וְאַלְפַּ֥יִם וְאַרְבַּע־מֵאֹ֖ות שָֽׁקֶל׃ uneḥoshet hatenufah shiveʿiym kikar weʾalepayim weʾarebaʿ־meʾowt shaqel׃

³⁰ וַיַּ֣עַשׂ בָּ֗הּ אֶת־אַדְנֵי֙ פֶּ֚תַח אֹ֣הֶל מֹועֵ֔ד וְאֵת֙ מִזְבַּ֣ח הַנְּחֹ֔שֶׁת וְאֶת־מִכְבַּ֥ר הַנְּחֹ֖שֶׁת אֲשֶׁר־לֹ֑ו וְאֵ֖ת כָּל־כְּלֵ֥י הַמִּזְבֵּֽחַ׃ wayaʿas bah ʾet־ʾadeney petaḥ ʾohel mowʿed weʾet mizebaḥ haneḥoshet weʾet־mikhebar haneḥoshet ʾasher־low weʾet kal־keley hamizebeaḥ׃

³¹ וְאֶת־אַדְנֵ֤י הֶֽחָצֵר֙ סָבִ֔יב וְאֶת־אַדְנֵ֖י שַׁ֣עַר הֶחָצֵ֑ר וְאֵ֨ת כָּל־יִתְדֹ֧ת הַמִּשְׁכָּ֛ן וְאֶת־כָּל־יִתְדֹ֥ת הֶחָצֵ֖ר סָבִֽיב׃ weʾet־ʾadeney heḥatser saviyv weʾet־ʾadeney shaʿar heḥatser weʾet kal־yitedot hamishekan weʾet־kal־yitedot heḥatser saviyv׃